USA ka lalaking taga dakbayan sa Tagum ang nasikop sa mga tanod sa Barangay New Malitbog, dakbayan sa Panabo, human nasakpang naghupot og hinagiban, Sabado sa buntag.

Ang dinakpan giila nga si Daniel Desta, 22, ug molupyo sa Salazar Village, Barangay La Filipina, dakbayan sa Tagum.

Sa report gikan sa Panabo City Police Station nasayran nga nasikop ug gitugyan ngadto sa buhatan sa kapulisan sa mga tanod sa barangay nga sila Dionesio Noquia, Macario Herbolinggo, ug Danilo Goc-ong ang suspek human nasakpang naghupot og usa ka hinagiban pasado alas 6:20 sa buntag.

Nasiplatan sa mga nagpatrolyang tanod ang suspek nga nagdala-dala og usa ka mahait nga hinagiban didto sa Purok 1, sa susamang barangay.

Nasakmit gikan sa dinakpan ang usa ka sundang nga dunay gitas-on nga 16 ka pulgada, mga electrical wiring ug uban pang gamit.

Ang suspek ang temporaryong gipaslak sulod sa selda samtang giimbistigahan pa sa kapulisan ang iyang kaso. (Marvin Pineda)