Tindero gipatay

Saturday, March 20, 2010

PATAY ang usa tindero og isda human gipusil didto sa probinsiya sa Maguindanao.

Biktima giila sa kapulisan nga si Titing Usman, 40 anyos, minyo, molupyo sa barangay Poblacion, Parang.

Have something to report? Tell us in text, photos or videos.

Sigun sa taho gikan Maguindanao Police Provincial Office, nasayran nga banda alas 2:00 sa hapon, Marso 19, nahitabo ang pagpatay.

Samtang nagtindog ang biktima duol sa iyang pinuy-anan giduol kini sa duha ka wala mailhing suspek og gipusil gamit ang .45 nga pistola.

Human malup-og ang biktima, abtik sab nga misibat ang mga mamumuno sakay sa usa ka XRM nga motorsiklo paingon sa wala matino nga direksyon.

Gisapupo sa iyang pamilya si Usman ug gidala sa Cotabato Regional and Medical Center sa siyudad sa Cotabato apan gideklara kini sa mga attending physician nga dead on arrival gumikan sa grabeng samad pinusilan sa iyang dughan ug tangkugo.

Matud ni Ayab nga sa wala pa gipatay ang iyang bana may naka-away kining grupo sa palengke gumikan sa ilang negosyo.

Nanaghap sab si Parang Municipal Mayor Talib Abo nga posibling personal nga atraso o away sa druga ang motibo sa pagpatay sa biktima nga kanhi nalambigit sa pagpayuhot og shabu.

Ang kapulisan padayong nag-imbestiga sa krimen. Nagpaniid na sab sila sa palibot sa pamasin nga masiplatan ang mga suspetsado. (Edgardo Fuerzas)