Ni Junhan B. Todiño

Pro Bono

DILI kuno P2 milyones ang utang ni konsehal Reynaldo Advincula sa iyang abangan sa mga puwesto sa merkado publiko sa Cogon. Matud sa konsehal moabot lang og P140,000 ngadto sa P150,000 iyang utang sa UKC Builders. Aw diay.

Pero sa ngan nga utang na konsehal tataw nga dili ka matinumanon sa imong obligasyon. Nganong miabot man nianang kantidara kon nagtuman ka pa sa imong responsibilidad. Kumusta kaha imong ubang transaksyon, ingon ba usab niini nagtangag og dagkong kantiadad nga utang?

Patugatuga man ka og abang, kuha og daghang puwesto sa merkado unya dili man diay makabayad. O nagmakahi lang gyud ka sa pagbayad aron hangtod malimtan. Dili na maayong binuhatan konsehal, bayri na ha. Halangdon man kaha ta di ba?

Karon gusto ka nga himuon nalang eskwelahan ang mga merkado publiko sa Bulua, Carmen ug Cogon o i-donate ngadto sa Technical Education and Skills Development Authority. Hahahaha kataw-anan.

Dihang gipasar sa konseho sa siyudad kining BOT contract uban sa UKC Builders, di ba, diha man ka Sir. Duda nalang hinuon ko nga dunay nagdiktar nimo kaniadto hinungdan nga yango lang dayon ka. Wa diay ka sa imong maayong paminsar niadtong tungora ug karon lang ka nakaamgo nga mas maayo diay nga hinuong eskwelahan.

Unsa pa man kaha nga ordinansa o resolusyon sa kontrata nga imong gisuportahan kaniadto nga wala ka sa imong kaugalingon. Klarohon daw nato ni bi. Kanang maglantugi mo diha sa hawanan sa konseho, scripted diay na, dunay nagdiktar ninyo? Kon ako pa kang anak, kaayong bunalan. Pabadlong baya ka oy!

Insakto kining panawagan sa minoriya sa konseho nga gipangulohan ni konsehal Teodulfo Lao nga ipa-resign si Advincula.

Sultihan taka Sir, dili man daotan kon duna tay utang. Halos tanang tawo, nagtuo ko nakapangutang gyud. Pero kining imo, wa ka mangutang apan nahimong kang utangan kay wa ka mobayad sa imong obligasyon.

Hala, bantay ka konsehal, manakod baya ning gahi ta mobayad sa utang, unya labaw nang manakod kining dili motuman sa obligasyon. Unsa kaha no imong gipangsaad sa katawhan panahon sa kampaniya. Gituman ba kaha nimo? Sulayi kuno og panamin Sir, unya tutoki imong mata, kon di ka kaharong og tan-aw, nan, mao na na. Tag-ana.