MAAYONG pagkabuak sa ulo sa usa ka tawo dihang giatsa sa iyang silingan sa wa pa masayri nga hinungdan Domingo sa kaadlawon didto sa Arroyo Compound, Barangay Matina Crossing, siyudad sa Davao.

Ang biktima mao si Reynaldo Tayao, 29, ulitawo, construction worker; samtang ang suspetsado mao si Roel Adap, 31, minyo, pulos lumad nga taga Don Marcelino, Davao del Sur ug nagpuyo sa Arroyo Compound.

Si PO2 Cirilo Flores, duty investigator sa Talomo Police Station, nagbutyag nga ang biktima nadiskubrehan nga wa nay kinabuhi ug nabulit sa kaugalingong dugo sud sa bay sa suspetsado sa alas 5:00 sa buntag sa Domingo.

Ang kamatayon sa biktima nadiskubrehan sa iyang igsuon nga si Brendo Tayao kinsa nangita sa namatay nianang pagkabuntag.

Si Brendo maoy mipahibalo sa kapulisan bahin sa nahitabo sa iyang igsuon mao nga gisusi dayon ni Flores.

Matud ni Flores nga ang biktima nakaangkon og usa ka samad sa iyang ulo agi sa atsa mao nga siya namatay.

Nahipus sa mga otoridad gikan sa bay sa suspetsado ang usa ka atsa ug T-shirt nga kolor puti, dunay marka nga "Bagsik Tindi Power Bullets" nga nagkadugo ug gituhoan nga gipanag-iyahan sa suspetsado.

Mga nahipus nga atsa ug T-shirt atua na karon sa buhatan sa Scene of the Crime Operatives (Soco) aron himuong ebidensiya ngadto sa korte.

Sa gihimong makuting imbestigasyon sa kapulisan, nasayran nga alas 2:00 sa kaadlawon kagahapon nag-inom ang biktima ug suspetsado didto sa Quiñones Compound, Mahayahay, Diversion Road, Barangay Matina Crossing.

Human sa ilang panag-inom sa alas 4:00 sa kaadlawon, nakahukom ang duha nga mouli sa ilang lugar aron mopahulay apan posibleng nagkabikil ang sila mao nga nahitabo ang krimen.

Ang suspetsado, human sa hitabo, gituhoan nga milayas sa maong lugar aron di masikop sa kapulisan.

Tungod niini, gimandoan ni Police Supt. Michael John Dubria, hepe sa Talomo Police Station, ang iyang mga sakop nga pangitaon ang suspetsado aron sikopon ug silotan sa iyang sala nga nahimo. (AD)