SI kanhi Asian Games gold medalist ug usa sa mga batan-ong manumbolay sa dakbayan sa Davao Gandy Valle maoy nahimong kampeyon sa 2 ka adlaw nga 2008 Sun.Star-Superbalita Mindanao Open 9-Ball Challenge nga gilusad didto sa B3 NCCC Mall-Davao niadtong Sabado sa gabii.

Gibuntog ni Valle ang kuyaw ug batan-ong taga siyudad sa Davao nga si Val Pajuay, 9-4 human ang halos usa ka oras nga kombate.

Kalit nga misirit si Pajuay ug gi-serohan si Valle sa unang hugada sa ilang kombate. Apan nakabawi ug nakatabla si Valle, 2-2, human nga nasipyat si Pajuay sa iyang tira sa ikatulong hugna.

Migukod pa unta si Pajuay, 6-4, apan wala na makalahutay human nga nasipyat sa importanteng tira sa ikalima ug ikasiyam nga hugna ug wala na siya lingi-a ni Valle aron nga angkunon sa naulahi ang premyo ug titulo sa kompetisyon.

Gibulsa ni Valle ang kantidad nga P30 mil ug usa ka tropeyo nga gitunol ni Sun.Star Publishing, Inc. Presidente Orlando P. Carvajal atol awarding ceremony uban ni Sun.Star Davao General Manager Joseph Griño, Davao Billiards Association President Menlee Migellano ug ang duha ka mga opisyal sa Games Amusement Board.

Si Pajuay midawat og P20 mil isip maoy 2nd placer sa maong torneyo.

Sayo niini, gibuntog ni Valle si Allan Abuel, 8-4 sa quarterfinals, Danny Otacan nga taga San Francisco, Agusan del Sur, 9-4, sa semifinal race to 9 aron nga makahan-ay og kombate batok kang Pajuay nga nakalusot sab kang Oliver Villafuerte, 5-6, sa quarterfinals, ug Timcang, 9-6 sa semifinals.

Ang 31 anyos nga si Valle maoy mihari sa Sun.Star-Superbalita 9-Ball didto sa Cebu niadtong Hunyo karon lang tuiga.

Samtang ang 32 anyos nga si Elmer Haya nga taga siyudad sa Zamboanga, seeded player sama kang Valle sa kompetisyon, nahiluna lang sa ikalima nga puwesto human natagak atol sa kombate sa quarterfinal batok sa beteranong manumbolay sa siyudad sa Davao nga si Romeo Timcang, 8-5.

Apan si Timcang miluhod kang Danny Otacan, 9-8, alang sa panag-ilog sa ikatulong luna.

Si Otacan mibulsa og P12 mil samtang si Timcang P8 mil isip 4th placer.

Sila si Allan Abuel, Anthony Adonis ug Oliver Villafuerte nakadawat sab og tag-P1,500 isip mga quarterfinalists.

Ang torneyo gipasiugdan sa Sun.Star Davao ug Superbalita pinaagi sa pagpakig-alayon sa Davao Billiards Association ug gisuportahan sa Ginebra San Miguel, B3 NCCC Mall, Aquabest ug Banok's isip maoy mga isponsor. (WGM)