Villareal: Angayan ba nga puy-an ang dakbayan sa Dabaw?

Wednesday, February 17, 2010

DAGHAN kaayong katarungan nga atong ikapanghambog ang dakbayan sa Dabaw labaw sa ubang dakbayan sa Pilipinas.
Usa-usahon nato kini aron masayran sa mga sumusubay ning atong lindog nga Baruganan.
Ang dakbayan sa Dabaw dili duawunon sa kalamidad sama sa unos o bagyo ug napahimuslan sa katawhan ang kaanindot sa kahimtang sa panahon nga maoy hinungdan
nga bisan unsang higayon makapananum ang atong mga mag-uuma nga dili madisturbo.

Nakaangkon usab ang dakbayan sa Dabaw sa labing maayo ug de kalidad nga tubig ilimnon sa tibuok kalibutan.

Have something to report? Tell us in text, photos or videos.

Gani naila pa gayud kini nga labing hinlo, seguro ug hupong sa minerales nga tubig.

Adunahan pa gayud ang dakbayan sa multi-cultural ug cosmopolitan peoples, kay panimalay kini sa napulo ka mga dagkong hut-ong sa mga lumad ug Muslim ug gidugok sa mga nagkalain-laing kaliwatan gikan sa ubang bahin sa Pilipinas.

Nia kitay lig-on ug gawasnong lokal nga pangagamhanan, labing segurong duawanan sa mga bisita kay ang dakbayan sa Dabaw nakatala og labing ubos nga crime rates sa tibuok kalibutan (0.8% sa matag 10 mil ka tawo).

Nia pod sa dakbayan ang labing andam sa pagtubag sa matag emerhensiya sa tibuok Asya.

Kining Central 911 nga sama sa Estados Unidos ug Canada, apan ang nakalahi kanato sa nahisgutang mga nasud kay libre ang serbisyo sa Central 911 sa dakbayan.

Ekselente ang public utility ug infrastructure, sama sa 24 oras nga suplay sa elektrisidad ug giila sa Asya-Pasipiko nga labing maayong water utilities ang Davao City Water District.

Sa mga produkto sama sa saging, pinya ug bulak sama sa kisol o orchids ug isdang tuna dili matupngan ang ka-abunda niini.

Kung sa kahimsog, dili na pod malabwan kay ang dakbayan sa Dabaw mao ang nakasugnod sa nasyonal nga pangagamhanan lig-onon ang 'No Smoking Law' human nga gipasar sa Konseho ang 'No Smoking Ordinance'.

Wala usab napasagdan sa lokal nga kagamhanan ang katiguwangan ug unang nakatilaw ang mga senior citizens sa libreng pagtan-aw og sine.

Ang Davao City Police Office nahimo nang Hall Fame human kini mapasidunggan og Best Police Office sa highly urbanized city category sa tibuok nasud.

Unsa pay laing nimong pangitaon sa dakbayan sa Dabaw nga dunay mga tawo nga buot mogun-ob niini.

Angayan lamang seguro nga ideklarar nga 'persona non grata' si Anad partylist congressman Jun Alcover ug Bantay partylist congressman Retired General Jovito Palparan.

Alang sa imong komentaryo ug sugyot sulat lang sa email ad (leovillareal42@yahoo.com). Paminaw sab sa akong programa sa dxRD, 711 kHz, matag 7:00-8:00 sa gabii ug 6:30-7:30 matag buntag gikan Lunes hangtud Biyernes.