Daghan na gayud ang nagdeklarar nga managan karong 2010 presidential elections ilabina sa labing taas nga posisyon sa nasud ug ang posible nila nga mga pares.

Bisan sa lokal nga ang-ang, miposisyon na usab apan wala pay klaro.
Sa dakbayan sa Dabaw usa pa lamang gayud ang klaro nga modagan pagkamayor, kini mao si Vice Mayor Inday Sara Duterte-Carpio.

Sa unang distrito sa dakbayan sa Dabaw, si Atty. Kaka Nograles mora'g segurado na nga modagan hulip sa iyang amahan nga karon mao ang speaker sa kamara baha.

Sa mayoralty, wala pay klaro nga mamahimong kaatbang ni Inday Sara, sanglit dunay nagpatapsing-tapsing nga makonsiderar usab nga mga inila sa dakbayan.

Ang pagsulod sa politika maoy tahas sa usa ka tawo nga gisangon sa katawhan ubos sa pagtuo nga ang iyang gipili mao ang epektibong makatimon sa katawhan diha sa kalamboan ug kaugmaon sa nasud.

Kinahanglang makahimo kita og kaayohan karon tungod kay kining atong gipahimuslan karon gipahuwam lamang sa umaabot nga henerasyon.

Kung dili kita makahimo og maayo ron, paninglon gayud kita sa umaabot nga kaliwat.

Ang tinuod nga kalamboan manukad sa imong kaugalingon ug dili ang pag-usab-usab sa mga tawo nga nenerbisyo.

Kung usbon nato ang mga tawo nga nanerbisyo sa atong nasud, bisan og kapila pa kahigayon, wala gihapoy kausaban kon mao ra gihapon ang iyang sistema sa pagpangalagad.

Wala na tay panahon nga magtuon sa klase sa personalidad nga atong sangunan sa yugo sa pangatungdanan, ug nahibalo ko nga ikaw nakahibalo na kon kinsa kana siya, apan sagad kanato himuon na lamang panginabuhi ang eleksiyon, maong dili ta makapili og maayo kay kon kinsa kadtong makahatag kanato og maayuhon bisan luyo sa tanan nga kining politiko nga nanghatag kanato og salapi bugti sa atong boto, dunay dautang plano kon mapahimutang na siya sa posisyon.

Dili na nato tugutan nga prayoridad kanato mao ang panginabuhi, apan kon unsaon nato pagpakabuhi diha sa himsog nga pangagamhanan.

Ayaw isugal ang kaugmaon sa atong nasud ug henerasyon, mas nindot og nakaila ka kon kinsay imong pilion.

Ang politiko nga mikapital og dakong salapi aron makakupot og gahum, ang gahum nga atong gitugyan kaniya mao ra usab ang mobawi sa salapi nga iyang gigasto.

Alang sa imong komentaryo ug sugyot sulat lang sa email ad (leovillareal42@yahoo.com). Paminaw sab sa akong programa sa dxRD 711 kHz matag 7:00-8:00 sa gabii, Lunes hangtud Biyernes.