Villareal: Mabuhay ang Dabawenyo

Wednesday, March 17, 2010

MALAMPUSON ang gisaulog nga ika-73 anyos nga kasaulogan sa siyudad sa Dabaw kaniadtong Marso 16 nga giingong katapusang selebrasyon ni Mayor Rody Duterte human ang kapin 20 anyos niya nga pagka-alkalde niini.

Matud ni Duterte nga katapusan kini niya nga selebrasyon tungod kay dili kuno siya mamahimo pa nga mayor sa siyudad sa Dabaw. Sa laktod, wala na siyay plano pa nga mobalik pagka-mayor ug itugyan na lamang niya kini sa mamahimong mapilian sa mga Dabawenyos. (Ang bug-at nga nag-atbang karon sa pagka-mayor mao sila vice mayor Inday Sara Duterte ug speaker Prospero Boy Nograles).

Have something to report? Tell us in text, photos or videos.

Natural nga ang gusto ni Duterte nga mosalo sa iyang posisyon mao si Inday Sara nga karon maoy kasamtangang besi mayor.

Ang dakbayan sa Dabaw human ang 73 anyos, dili na gayud malupigan sa ubang siyudad sa tibuok Pilipinas kon ang hisgutan sa kahusay ug kalinaw, ekonomiya, kalambuan ug lig-ong liderato.

Dili pa lamang dugay gideklarar si Mayor Duterte sa Reader's Digest Magazine Asia nga usa sa 88 ka mga sinaligang indibidwal sa tibuok Asya ug garbo kaayo nato kining mga Dabawenyos.

Kung kalambuan ang hisgutan sanglit usa ako sa mga nagtuo sa liderato sa mga Duterte, dili usab nato ipalayo ang gibahin ni speaker Boy Nograles sa dakbayan sa dabaw ilabina sa unang distrito, siya usab ang namahimong labing unang Speaker of the House nga taga Dabaw.

Kahusay ug kaangayan lakip na ang pagsaka sa atong ekonomiya wala na mapugngi ug gani nia na ta sa dul-an upat ka bilyon ka pesos nga rentas (revenue) ang nakab-ot sa dakbayan sa Dabaw sa tuig 2009.

Midagsa ang mga tawo nga nanimpalad sa dakbayan tungod kay ilang nakita ang kalambuan niini. Buot ipasabot nga sa ilang gigikanan nagpait gyud ang kahimtang ug sa ilang pagtuo maayo ang nagpaabot nga kapalaran sa mga nahisgutan.

Busa kon huyang lang nga liderato ang dakbayan o bisan asang lugar kon dagsaan sa katawhan malusno gayud ang kahimtang niini.

Metro Davao ang tawag kanato ron tungod kay klase-klase na lamang kaliwat ang misulod sa dakbayan. Busa hagit ni Mayor Duterte nga nia na nanimuyo sa dakbayan sa Dabaw, kalimtan kon asa ka gikan ug tawagon na nato ang atong kaugalingon nga Dabawenyo.

Mabuhay ang mga Dabawenyo!!!

Alang sa imong komentaryo ug sugyot sulat lang sa email ad (leovillareal42@yahoo.com). Paminaw sab sa akong programa sa dxRD, 711 kHz, matag 7:00-8:00 sa gabii ug 6:30-7:30 matag buntag, Lunes hangtud Biyernes.