Villareal: Sona libre

Wednesday, January 27, 2010

NAKAGINHAWA karon ang mga kandidato sa ikaduha ug ikatulong distrito nga anaa nagpalandong sa Hugpong sa Tawong Lungsod sa dihang nagpaggawas og pamahayag si Mayor Rody Duterte nga i-sona libre o "free zone" ang maong mga distrito sa piniliay sa Mayo 10.

Kini nga kaugdahan nagpasabot nga lakip ang katawhan ma-sona libre sa ilang pagpili sa ilang mga higustuhan nga kandidato nga dili na mag-agad sa standard bearer sa Hugpong sa Tawong Lungsod kon kinsay ilang ibaligya sa katawhan.

Have something to report? Tell us in text, photos or videos.

Seguro nasabtan ni Mayor Duterte nga way kapuslanan kun mohatag siya og ideya sa katawhan sa nahisgutang duha ka mga distrito kon duna siyay bitbiton nga kandidato ilabina sa kongreso sanglit mayoridad sa mga nahisgutan nagpalandong man sa maong partido.

Kung kinsa maayo ug kugihan mangampanya kanila mao gayud ang mananaug.

Sa Distrito Dos, sa akong tan-aw mao gyud ang mabulokon tungod kay puro mga bag-o ang mga kandidato sanglit mga ilado.

Bisan si Mylene Garcia-Albano nga anak ni Nonoy Garcia ug igsuon sa incumbent dili pa makaseguro kay anaa sila Dado Mahipus ug Danny Dayanghirang nga mga karaang konsehal ug Joji Ilagan-Bian nga iladong lider-negusiyante.

Sa Ikatulong Distrito, nga giingong nakapabor si congressman Sid Ungab kay siya man ang incumbent apan tungod kay grupo ni Mayor Duterte ang nakapahimo kaniyang kongresista balik sa 2007 elections hinungdan nga kinahanglan usab maningkamot ron ang akong kababata ug klasmeyt nga gikan sa Calinan.

Ngano? Kay dili usab nato masukod ang katakus sa ubang kandidato, sama kang kanhi congressman Roy Lopez, ug siyempre ang gibitbit ug gipasalig ni Rev. Pastor Apollo C. Quiboloy nga si Kapitan Greg Canada sa Tamayong.

Pasaylo-a lang ko nga wala nako mahinganli ang ubang kandidato kay wala ko makaila kanila, luyo sa ilang pagka-ilado ug wala pod sila kaila nako.

Sa akong pagsabot, gihimo kini sa liderato sa HUGPONG tungod kay ang matag usa kanila dunay gidala nga nagkalain-laing partido nasyonal.

Alang sa imong komentaryo ug sugyot, sulat lang sa email ad (leovillareal42@yahoo.com). Paminaw sab sa akong programa sa dxRD, 711 kHz, matag 7:00-8:00 sa gabii, Lunes hangtud Biyernes.