USA ka waitress ang nangayo og panabang sa kapulisan human siya gilugos sa iyang kauban nga kusinero Domingo sa kaadlawon didto sa Jacinto Extension, siyudad sa Davao.

Aron mapanalipdan ang dungog sa biktima, siya gitago sa pangalan nga Jane, 21, nag-alagad sa usa sa mga kan-anan didto sa Jacinto Extension.

Si Jane midangop sa Women Children and Protection Desk human niya namatikdan nga gipanamas-tamasan siya sa suspetsado nga gitago sab sa pangalan nga James.

Ang biktima nagpahayag ngadto sa mga otoridad nga sa wala pa mahitabo ang pagpanglugos, malipayon silang nag-inom kauban ang suspetsado sulod sa balay sa ilang agalon.

Dihang medyo nahubog na sila, gimandoan ang suspetsado sa iyang nga ihatud ang biktima ngadto sa ilang pinuy-anan.

Imbes sa balay sa biktima ihatud sa suspetsado, didto na hinuon niya gidala sa iyang boarding house ang biktima diin nahitabo ang pagpanglugos sulod sa duha ka higayon.

Human milampos ang suspetsado sa iyang tinguha ngadto sa dalaga, dali siyang mibiya sa maong boarding house ug gibiyaan ang biktima nga nag-inusara.

Sa pagresponde sa kapulisan, wala na nila maabti ang suspetsado mao nga gipangita siya karon sa mga otoridad.

Giandam na ang kasong lugos sa suspetsado aron manubag sa iyang salaod nga nahimo.

Tungod sa nahitabo sa biktima, mga pulis nagpahimangno ngadto sa mga dalaga nga dili makig-inom sa mga lalaki aron dili mahitabo ang nahitabo sa biktima. (AD)