USA ka wanted ang namatay human siya naunhi pagpusil sa mga pulis nga moaresto unta kaniya tungod kay misukol sa ala 1:40 sa kaadlawon kagahapon didto sa Piapi Boulevard, Barangay 22-C, siyudad sa Davao.

Napatay diha-diha dayon human naigo sa ulo mao si Abdul Jabbar Uy, 30, minyo, way trabaho, nagpuyo sa Riverbed, Sta. Cruz, Barangay 22-C, ning siyudad.

Si Uy dunay warrant of arrest nga gipaguwa ni Judge Romeo Albaracin sa Regional Trial Court Branch 9 sa paglapas sa Republic Act 9165 kun Dangerous Act nga dunay criminal number 64,432-2008.

Basi sa talaan sa kapulisan sa Sta. Ana Police Station, nakadawat sila og taho gikan sa kasaligan nga tinubdan nga nasiplatan ang biktima nga nanghasi sa ilang lugar sa alas 10:00 ang takna sa gabii niadtong Martes.

Si Uy gikatahong nagbitbit og armas ug usa ka granada hinungdan nga nangayo silag police assistance aron santaon ang suspetsado.

Human nadawat ang taho, nanglihok dayon sila SPO1 Bangcas, PO3 Daquigan, PO3 Dionisio, PO2 Arellano ug PO2 Asupan dala ang orden de aresto aron sikopon ang suspetsado.

Dihang miabot ang mga pulis, ilang nasiplatan nga nagdula ang suspetsado og computer games didto sa Blk. 47 tupad sa Carlo Store sa maong barangay ug didto ilang giduol dungan sa pagpaila sa ilang kaugalingon nga mga pulis.

Si Uy kinsa nakalitan sa pag-abot sa mga pulis miibot sa iyang kalibre .45 nga pistola gikan sa iyang hawak aron pusilon ang mga pulis hinungdan nga napugos ila SPO1 Bangcas ug PO3 Daquigan sa pagpabuto sa ilang service firearms.

Nahimo sa mga pulis ang pagpabuto sa ilang armas aron panalipdan ang ilang kaugalingon mao nga naigo ang suspetsado sa iyang ulo hinungdan sa iyang kamatayon.

Nakuha sa kapulisan ug sakop sa Scene of the Crime Operatives (Soco) gikan sa suspetsado ang usa ka .45 Colt MK4 Pistol nga dunay walo ka buhing bala, usa ka magazine nga dunay pito ka buhing bala, ug duha ka pakiteng shabu sa iyang bulsa.

Nakuha usab sa dapit diin nahitabo ang krimen ang usa ka baseyo sa .9mm kalibre nga pistola ug usa ka slug sa bala sa wa pa matino nga kalibre sa armas.

Ang patay'ng lawas ni Uy atua gihaya sa Angel Funeral Homes sa dalang F. Torres ning siyudad samtang ang mga narekober nga armas, bala ug shabu atua sa kostudiya sa Soco.

Mga pulis nga nahinabi sa Superbalita nagsulti nga nagbahad ang suspetsado nga di siya magpadakop nga buhi hinungdan nga sila nagtuo nga nagbaton og armas ang suspek aron panalipdan ang iyang kaugalingon. (AD)