USA sa mga suspek nga drug pusher sa Autonomous Region in Muslim Mindanao (Armm) nadakpan sa siyudad sa Cotabato.

Ang kapulisan nag-ila sa suspek nga mao si Nasser Parte, 47 anyos, minyo ug molupyo sa barangay Kalsada, Sultan Kudarat, Maguindanao Province.

Sigun sa taho gikan sa Cotabato City Police Office nga banda alas 7:00 sa gabii, Nobyembre 4, gisulod sa hinusang puwersa sa PDEA- Armm, Task Group Tugis ug City PNP ang safehouse sa suspek sa purok Sampaloc, Mother barangay Bagua, ning dakbayan.

Tungod kay nakalitan sa ronda sa mga otoridad, nadakpan si Parte ug nakuha gikan sa iyang posisyon ang wa pa matino nga gramo sa gituohang shabu, mga kagamitan sa druga, usa ka kalibre .45 nga pistola ug mga buhing bala.

Si PDEA- Armm Regional Director Maldan Mocaram, nagkompirma nga si Parte nalambigit sa pag-ambush sa mga PDEA agent niadtong miaging Abril 13 sa barangay Dalumangcob, Sultan Kudarat, Maguindanao Province. Sa maong pagbanhig, duha ang napatay ug upat ang naangol sa nagronda nga pundok.

Gidugang ni Mocaram nga ang suspek usa ka kanhi sakop sa Moro National Liberation Front (MNLF) ug usa ka 'integree' sa 75th Infantry Battalion sa Philippine Army, apan natangtang sa serbisyo gumikan sa pagpayuhot sa gidiling druga.

Si Parte padayong gi-imbestigahan aron matumbok ang iyang mga kauban samtang gibalhug na siya sa Maguindanao Provincial Jail.