MATUD pa sa kanhing broadcaster nga nahimong magbabalaod sa atong dakbayan nga duha ra ka tawo dinhi sa kalibutan: ang moilad ug ang magpailad. Tungod ug nunot tingali sa kalisod karon, daghang mga pagpangilad ang atong nabatian sa atong palibot. Bisan sa mga pahimangno sa atong awtoridad daghan pa gihapon ang mailad sa budol-budol. Binlan kunohay ang giilad og usa ka bag nga puno sa kuwarta nga ipalit og sakyanan o yuta samtang may asikasuhon pa siya. Aron seguradong di molakaw ang gibinlan, hulamon usa niini ang relo o kaha kuwarta nga magamit kay lisud magdala'g daghang sapi sa sentro.

May nailad sab sa gold bars ilabi na diha sa may Buda ug bandang Bukidnon. Duna daw nakalot ang mga lumad nga binaritang bulawan nga ilang ibaligya nga barato ra.  Padalhan pa ang mailad og sample sa kunuhay ginabas nga barita aron ipa-assay. Tuod man kay tinuod nga gold ang gigabas nga sample, mobalik gayud ang nailad ug magdala'g sapi didto sa lumad ug didto na sa pagbayad ang hold-up.  Limas tanan apil ang cellphone, relo, sapatos ug uban pang puwedeng ibaligya.

Anaa pa kining text-text nga mora'g hold-up sa atubang. Kung wa pa naagrabyado si senador Enrile di unta ma-istoryahan sa senado. Mao diay kini ang rason nga bisan ako naigo usab.  Bag-o lang ko ni load ug pag-erase nako sa confirmation nga niabot ang load, wagtang load na dayon.
Magdali-dali ka'g tan-aw sa imong cellphone kay abi og importanteng mensahe apan sunod-sunod diay nga promo nila.  Mas daghan pa nga ilad sa internet. Gikan sa pagkadaug kuno nimo sa lottery hangtud nga tagaan ka'g minilyon sa kabtangan sa namatay nga adunahan o sa nasira nga bangko o kompaniya.
May mga conference kunohay nga imong tambungan sa gawas sa nasud nga libre ug uban pang uban. Busa way kumo nga i-double check kanunay ang mga hanyag nga mora'g mohatag og langit sa tawong nag-ilaid sa kalisod.

Asembliya sa CASE

Aron magpadayon ang pagpangita og hustisya sa mga namatay pinaagi sa gitawag nga extrajudicial killings, ang Coalition Against Summary Execution (CASE) magpahigayon og asembliya niadtong Hunyo 27 sa Redemptorist Seminar Hall. Gilangkuban sa mga sakop sa mga relihiyusong grupo, NGOs, HR groups, pamilya sa biktima, academe ug sa nagpakabanang katawhan. Mahinumduman nga naghimo og imbestigasyon mahitungod sa gitawag nga DDS ang Comission on Human Rights sa Davao.  Gawas niini, nagpagawas usab og report ang Human Rights Watch sa susamang kaso nga ilang nakalap sa mga dakbayan sa Davao, Digos, General Santos ug Cebu. 

Gihandom sa coalition nga unta mahunong na gayud ang susamang paagi sa pagpamatay bisan pa man kon kini sila sad-an tungod kay may balaod man kita nga gituman. 

Gawas pa, ang atong batakang balaod ug mga international covenants sa tawhanong katungod diin nipirma ang Pilipinas nag-ila kanunay sa kabililhon ug dignidad sa kinabuhi. 

Ang sistemang demokratiko sa nasud nagtudlo usab nga paga-ilhong inosente ang dinakpan hangtud nga mapamatud-ang siyang sad-an sa atong hukmanan. Way luna sa atong katilingban ang summary execution.