NAGKAGUBOT ang mga residente sa Barangay Cugman human namatikdan nga daghang isda ang nagluya ug nangamatay kagahapon mga alas 9 sa buntag sa suba sa Cugman ning siyudad sa Cagayan de Oro.
Pipila sa mga residente ang nanguha sa mga dagko ug gagmay’ng isda sa rason nga mapuslan pa kini ug masud-an. Ang pipila ka residente nasayangan lamang sa mga gagmay’ng isda nga naapil ug kamatay.
Nasuta nga daw tambal sa mangga ang nakapatay sa maong mga isda tungod kay ilang nahibaloan nga giyabo ug didto gihugasan ang mga balde nga sudlanan sa tambal nga miresulat sa pagkamatay sa mga isda. Dako ang ilang pagtuo nga dili kini makahilo labina kuhaan lamang ug mga tina-e.
Kahinumduman niadtong December tuig 2011 adunay pagkamatay usab sa mga isda sa maong dapit.
Gibana-banang mokabat sa 50 ka kilo sa nagkalain-laing isda ang nakuha.
Hinuon ang Bureau of Fisheries and Aquatic Resources (BFAR) nipahimangno sa mga katawhan nga unta dili kini kaonon hangtod dili masuta kung unsang klase nga kemikal ang nakapatay sa maong mga isda.