WA natabang ug namatay ang usa ka lalaki nga nagmaneho sa iyang motorsiklo human kini nabanggaan sa pampasaherong dyip atubangan sa usa ka tulunghaan sa national highway, dakbayan sa General Santos, Huwebes sa gabii.

Ang buhatan sa Traffic Control Division nag-ila sa biktima nga si Viverlito Villarin, hamtong ang pangidaron, ug molupyo sa Purok Malipayon sa Barangay Labangal, ning siyudad. Ang biktima unang gidaganan sa drayber sa pampasaherong dyip nga nakabangga kaniya apan wa nagdugay, misurender gihapon ang maong drayber ug giila nga si Louie Morano, hamtong usab ang pangidaron, ug taga-Lote, Barangay Calumpang, ning siyudad.

Sa pakighinabi sa Superbalita ni PO3 Said Mohammad kagahapon, ang biktima nagmaneho sa iyang motorsiklo nga dunay sidecar nga nagbaton og plaka 8049 MG gikan sa direksiyon sa South Cotabato alas 6:30 sa gabii.

Apan pag-abot sa Hadano Park, atubangan mismo sa Polytechnic College sa national highway, usa ka pampasaherong dyip padulong sa Apopong ang misungag ngadto kaniya.

"Ang vehicle 1 (motorsiklo) was heading to the north direction while vehicle 2 (dyip) was travelling south, opposite direction ni sila. Base sa atong imbestigador, mi-overtake ang jeep didto sa lane sa motor mao nga nag-abot sila. At the point of impact, vehicle 2 swirved at the left side portion of the road and both vehicles were heavily damaged," pahayag ni Mohammad.

Dugang sa pulis nga paghuman sa hitabo, mipasirit og padagan sa iyang gimanehong dyip ang drayber, samtang usa ka concerned citizen ang midala sa biktima ngadto sa Mindanao Medical Center (MMC) apan wa natabang ang biktima ug nabugtuan gihapon kini sa iyang kinabuhi.

"Dead on arrival na ang biktima sa ospital. Nasayran ang ngalan sa drayber sa dyip tungod kay mi-surrender kini sa among buhatan," sumala ni Mohammad.

Sa kasamtangan, tanggong karon sa selda sa Traffic Control Division si Morano kinsa niadtong higayon sa pagbanggaanay nagmaneho og dyip.

"So far, wala pa nakaanhi ang pamilya sa biktima and we still don't know kung magpasaka ba sila og kaso against the suspect," panapos ni Mohammad.

Samtang nag-andam na usab sa pamilya sa biktima aron mahatagan og pormal nga haya ang ilang kabanay. (JGRS)