NAGPATAMBAL ang duha ka mga lalaki human gipusil sila sa guwardiya sa usa ka luna sa Barangay Tambler, dakbayan sa General Santos pasado alas 9 sa gabii niadtong Sabado.

Mga biktima giila sa kapulisan nga sila si Manuel Aguerra, 47 anyos, molupyo sa Purok 1, Barangay Tambler, ning siyudad, ug si Rene Somblingo, 53, ug molupyo sa Uhaw sa Barangay Fatima.

Si PO2 Edgardo Banguiran, sa Tambler Police Station, nagtug-an sa Superbalita kagahapon sa buntag nga gipangpusil ang mga biktima sa security guard sa Gutierrez Farm sa Purok 1, sa Tambler gamit ang pellet gun alas 9:45 sa gabii.

"Wala nailhan sa mga biktima ang guwardiya. Gipangpusil ni sila kay namugos og sulod didto sa luna. Base sa among imbestigasyon, gina-claim sa mga biktima nga yuta nila ang maong luna nga ginabantayan sa gwardiya. Naa'y forcible entry nga nahitabo hinungdan sa pagpamusil," pahayag ni Banguiran kinsa nagdugang nga wala nadakpan ang guwardiya hangtud karong panahona.

Samtang sa taho sa Bombo Radyo General Santos kagahapon, giingong 12 gauge shotgun ang gigamit sa pagpamusil ngadto sa mga biktima apan giklaro ni Banguiran nga dili shotgun ang gigamit sa suspetsado apan usa lamang ka airsoft pellet gun.

"Dili shotgun, pusil lang nga ginagamit sa sports, kaning pellet gun. Dili grabe ang mga samad sa mga biktima pero nagpatambal ni sila kay ubay-ubay pod ilang igo, makalakaw man sila ug mora'g wala sila giingong na-admit gyud," sumala ni Banguiran.

Dugang usab sa pulis, wa pa sila'y ideya kung buot bang magpasaka og reklamo sa mga biktima tungod kay wa pa nahuman ang imbestigasyon may kalabot sa insidente. (JGRS)