KORONADAL CITY -- Nangin madugoon ang fiesta sang isa ka barangay dire sa siyudad niatong Sabado sang gabii bangud sa rambolanay sang duha ka mga grupo sang mga kalalakihan, kun sa diin lima sa ila ang pilason nga ginpangdala sa ospital.

Sa lima nga mga pilason, isa ang yara sa talandogon nga kahimtang bangud sa buno nga naagom sini.

Ginkilala ang nabun-an nga si alyas Alvin nga naigo sa tiyan kag kasamtangan nga nagapabulong sa sulod sang isa ka ospital dire sa siyudad.

Samtang ang mga pilason (bangud sa mga sumbag kag mga sipa) amo sanday Mark Gelarzo, Rowell Gonzales, Ariel Guanzon, kag isa pa nga wala makilal-an nga lalaki.

Puro sila tanan naga-istar sa nasambit nga barangay, kun sa diin nagsaulog sang iya fiesta pag Sabado.

Suno pa sa report nga halin sa city police station, nabulabog ang mga pumuluyo sang mga pasado alas-otso sa kagabhion sang magrambol ang duha ka mga grupo bangud sa wala pag-intindihanay.

Ginsulayan ini sila pangsaway sang mga katigulangan sang amo nga lugar pero waay ini sila nagpalamati kag nagpadayon pautwas sa mga kaakig nga ginabatyag nila sa kada isa.

Padayon pa nga gina-imbestigahan sang mga polis dire ang natabo nga rambolanay sa tunga sang nasambit nga duha ka mga grupo. (RHB)