DUHA ka mga lalaki ang midangat sa tambalanan human sila gipangdunggab sa duha ka managlahing lugar dinhi sa siyudad sa Davao niadtong Dominggo.
Mga biktima mao sila si Mark Oliver Dela Torre, 19, ulitawo ug nagpuyo sa Barangay 31-D Poblacion ug Zaldy Cardeno, 23, car watcher, nagpuyo sa Kasilak, Barangay 76-A Bucana, ning siyudad.
Si Dela Torre gidunggab sa alas 4:00 sa hapon didto sa Roxas Avenue, Quezon Boulevard sa duha ka wa mailhing mga tawo, sigun sa imbestigasyon ni Police Officer 3 Cunanan sa Sta. Ana Police Station.
Ang biktima, suma ni Cunanan, gigukod sa duha ka mga tawo apan naapsan siya didto sa Aurora Street diin didto siya gitiwasan pagdunggab hangtud nga natumba.
Si Dela Torre daling gidala didto sa Southern Philippines Medical Center (SPMC) samtang ang duha ka mga tawo nga midunggab kaniya daling misibat padung sa Fatima Church.
Samtang si Cardeno gidunggab sab 12:55 sa hapon sa tulo ka mga tawo didto sa kanto mga dalang Rizal ug Bolton, sigun sa imbestigasyon ni Police Officer 3 Sherwin Arbania sa San Pedro Police Station.
Si Cardeno nakaangkon og daghang samad sa iyang kalawasan dihang gihansakan siya og hait nga kutsilyo samtang nanghugas og sakyanan didto sa maong lugar.
Mga nakasaksi sa hitabo nagbutyag nga tulo ka mga tawo nga nagsakay og motorsiklo ang miabot sa nahimutangan sa biktima.
Niya pa, duha ka mga tawo ang mikanaog ug way daghang pangutana gidunggab ang biktima sa nagkadaiyang parte sa lawas.
Kritikal karon ang kahimtang sa biktima sud sa SPMC samtang ang mga midunggab kaniya gipangita sa kapulisan sa San Pedro Police Station. (AD)