TULO ka mga lalaki ang namatay human gi-salvage didto sa barangay Poblacion, lungsod sa Kiamba, Sarangani Province alas 10 sa buntag, Huwebes.

Ang kapulisan sa Kiamba Police Station nag-ila sa mga gipang-salvage nga sila si  Jerry Aduca, 37, minyo, mag-uuma ug iyang igsuon nga si Arnold  Aduca, 35, ulitawo, mag-uuma ug ilang ig-agaw nga si Rolly Aduca, 29, ulitawo, usa gihapon ka mag-uuma, pulos mga molupyo sa purok Masagana, barangay Nalus sa maong barangay.

Si Police Inspector Rexor Jake Carillo Canoy, hepe sa Kiamba Police Station, naghimo og imbestigasyon ngadto sa igsuon sa mga biktima nga si Clemente ug ilang nasayran nga  Miyerkules nananghid ang tulo nga managat.

Apan nakurat ang pamilyang Aduca tungod kay wala na makauli ang mga biktima sulod sa usa ka gabii, hinungdan nga nangayo sila og tabang sa kapulisan aron pangitaon sila.

Mao na lang ang ilang nasayran nga adunay tulo ka mga lalaki nga nakaplagan nga gipangbaklid ang ilang mga kamot gamit ang lukay (dahon sa lubi), samtang naputos og samad pinusilan ang ilang kalawasan.

Mga biktima nagtapad lang ang ilang nahimutangan sa dihang nakaplagan sa mga mananagat daplin sa baybay nga sakop sa 4th Tuka apan bisan usa ka tawo walay nakit-an sa palibot.

Nagpadayon karon ang gihimong imbestigasyon sa mga otoridad apan pakyas pa silang makakuha og mga testigo tungod kay mingaw ang palibot sa lugar nga nakaplagan ang mga biktima.

Nasayran nga ang Tuka, gikonsiderang usa sa mga lugar sa Kiamba nga gidayo og daghang mga bisita matag buwan tungod sa kalimpiyo sa tubig ug nahimong puy-anan sa mga isda o fish sanctuary.

Ang kapulisan wala miundang sa ilang gihimong imbestigasyon sa palibot ug sa pamilya sa mga biktima kung kinsa ang posebling nahimong nakaaway sa mga biktima nga misangko sa ilang kamatayon.

Si Kiamba Mayor Rommel Falgui mimando ngadto sa iyang kapulisan nga pangitaon ang nagpaluyo sa pagpang-salvage sa mga biktima.

Matud pa sa Mayor nga posebling dunay nakaaway ang mga biktima ug sila gisundan sa dihang mipadulong sa baybay aron managat.

Mga lawas sa tulo gidala sa ilang mga pinuy-anan. (Uban ni Mel Coronel)