UNOM ka mga batan-on ang nakatulog sa selda human nadakpan nga nagsinghot og rugby sa bakanteng luna sa Cahilsot Village, Barangay Calumpang, dakbayan sa General Santos, kagahapon sa kaadlawon.

Si PO2 Edgardo Banguiran, sa Tambler Police Station, kinsa nahinabi sa Superbalita kagahapon sa buntag, wala nagtug-an sa mga ngalan sa mga nadakpan tungod kay pulos sila mga menor de edad.

"Mga 15 ngadto sa 17 anyos ang mga nadakpan. Nadakpan sila sa mga tanod sa Cahilsot alas 12:55 sa buntag kaganina (kagahapon) duol sa basketbolan sa bakanteng luna sa Cahilsot Village," sumala ni Banguiran.

Nasuta nga ang mga nadakpang batan-on pulos molupyo sa Cahilsot Village ug nakuhaan og usa ka botelya nga rugby ug pipila ka mga plastic cellophane sa mga nagrondang tanod.

Sumala ni Banguiran, ipailawon sa usa ka counselling ang mga nadakpang batan-on kauban ang ilang mga ginikanan.

"I-release namo sila paghuman sa counselling kauban ang ilang ginikanan," butyag sa pulis.

Nasayran usab nga mihangyo pa ang pipila ka mga ginikanan sa mga nadakpan nga dili na lamang ibalhog sa selda ang ilang mga anak apan wa misugot ang kapulisan. Sulti sa pulis, kinahanglan mapailawom ang mga nadakpang batan-on sa counselling lakip na ang mga ginikanan niini aron makasabot sa hustong balaod. (JGRS)