SI General Santos City Mayor Pedro Acharon Jr,. mihatag og ultimatum sa kapulisan sa dakbayan nga sulbaron ang nahitabong paglabay og duha ka mga granada sa dakbayan nga ang una misamad sa 28 ka mga tawo.

Matud ni Acharon nga gihatagan niya ang General Santos City Police Office (GSCPO) hangtud Enero 5 aron mahuman ang ilang imbestigasyon apan sa higayon nga wala pay mga suspek nga matumbok sa pagpanglabay og granada niadtong Disyembre 24 ug 31 sa police box ug Oval Plaza, iya na lang itugyan kang General Fidel Cimatu ang rekomendasyon ngadto sa iyang mga tawo.

"Sa akoa lang gihatagan nako sila og usa ka semana nga humanon ang ilang imbestigasyon, kung wala pa gihapon silay matudlong mga suspek mohatag na ko sa ilaha og ultimatum kung dili gihapon ako na pakigsultihan si Regional Director General Fidel Cimatu aron mahatagan og hustisya ang mga nabiktima, kay mga nangaigo sa Oval nadamay lang to sila," matud ni Mayor Acharon.

Unang gidala sa ospital ang pulis ug iyang uyab human giitsahan og granada sa police box sa barangay Lagao, Diyembre 24. Apan nasundan ang insidenti dihang gilabayan og granada ang mga tawo sa Oval Plaza kinsa nisugat unta sa bag-ong tuig. mikabat sa 26 ang samdan ug nadala sa ospital.

Natahap ang Mayor nga posebling mga pulis ang target sa granada kay adunay duha ka mga pulis nga anaa sa Oval Plaza dihang nahitabo ang pagbusikad.

"Posebling ang target sa granada ang mga pulis, mao kana ang usa sa mga anggulong ginatan-aw namo karon ug kinahanglan nga palawman pa ang imbestigasyon," dugang ni Acharon.

Sa kasamtangan nakatala na lang ang City Social Welfare Development Office (SCWDO) og unom ka mga biktima nga nagpabilin pa sulod sa ospital apil na dinhi ang duha nga anaa pa gihapon sa talandugong kahimtang nga sila si Michelle Dogomeo, molupyo sa barangay North ning dakbayan sa General Santos ug Larry Managbanag, 31, ulitawo, ug molupyo sab sa Suralah, South Cotabato.

Ang Alkalde mibisita sa duha nga anaa sa ICU sa St. Elizabeth Hospital ug Doctors Hospital ug nagtunol sab sa iyang pinansiyal nga tabang sa mga pamilyang nabuthan. Siya usab misaad nga motabang ang siyudad sa mga tambal sa duha nga nagrabihan sa pagbusikad sa granada.

Gisaad sab sa mayor nga ipadayon ang imbestigasyon sa kaso aron masilotan ang nagpaluyo sa pagpangitsa og granada. (Mel Coronel)