SA pagtuo nga makakuha og dakong kantidad sa kuwarta ug mga mahalong mga gamit, gitulis ang usa ka babaye sa duha ka wa pa mailhing mga suspetsadong naka-motorsiklo sa dalang Jose Catolico sa dakbayan sa General Santos alas 10 sa gabii, Martes.

Midangop sa buhatan sa Bula Police Station si Mimi Bayona, 21, molupyo sa Zapote Street, ning siyudad human siya gitulis sa duha ka mga lalaki samtang padulong sa boarding house sa iyang amiga.

Si Bayona nagtug-an sa pulis nga kauban niyang nagbaktas ang usa niya ka amiga padulong sa balay sa ilang higala sa Blk. 5 Llido Subdivision alas 10 sa gabii.

Samtang naglakaw, duha ka mga lalaki nga nagsakay sa single nga motorsiklo ang mitapad kanila. Si Bayona nagsulti nga ang back-ride nga lalaki ang maong mikanaug sa motor ug gitaparan siya dungan sa pagdeklara og hold-up. Gikatahong gitionan si Bayona og kutsilyo sa suspek hinungdan nga gihatag na lamang niya ang iyang bag.

Paghuman sa hitabo, misakay og balik ang lalaki ug misibat kauban ang laing lalaki sakay sa motorsiklo padulong sa merkado publiko sa dakbayan.

Matud pa ni Bayona nga walay plaka ang motorsiklo sa mga mitulis kaniya. Samtang atua sa sulod sa bag nga nakuha sa mga suspetsado ang pitaka sa biktima nga adunay kuwarta nga P60 ug cellphone nga nagkantidad og P1,450.

Bisan og nakawatan, dako gihapon ang pasalamat sa biktima tungod kay wala siya giunsa sa mga suspetsado. (JGRS)