HIMUON karong adlawa ang usa sa dakong pasundayag atol sa ika-11 nga Charter Anniversary sa dakbayan sa General Santos nga mao ang 9th Bangkarera. Kini ang lumba sa mga bangka ug pagahimuon sa Queen Tuna Park, kanhing Lion's Beach sa P. Acharon Boulevard.

Ang Bangkakera 2009, nga gi-organisa sa Bombo Radyo General Santos, hingpit usab nga gisuportahan dili lamang sa mayor sa siyudad apan lakip na sa kongresista sa South Cotabato.

Sa pakighinabi sa radyo, sila si Mayor Pedro Acharon Jr., ug si Congresswoman Darlene Antonino-Custodio, nag-awhag sa mga molupyo sa General Santos ug sa mga silingang probinsiya nga mosalmot sa maong kalingawan.

"Ang Bangkarera 2009 usa sa pinaka-alegre nga pasundayag sa 11th Charter Anniversary sa Gensan usa sa Tuna Festival. Nanghinaot ko nga malipay ang katawhan tungod kay abri kini sa tanan, wala'y bayad," sumala ni Acharon.

"Inaanyayahan ko, hindi lamang ang mga taga-Gensan, kundi pati na rin ang mga kapitbahay natin sa South Cotabato, Davao del Sur, at Sarangani Province na makisaya sa Bangkarera 2009," butyag ni Custodio.

Ang mga mosalmot sa maong aktibidad gikinahanglan nga mogamit og 16 horsepower nga makinang Honda. Pagasugdan kini alas 6 sa buntag ngadto sa alas 12 sa udto.

Ang tulo ka mga mananaog makadawat og Honda nga makina ug mahatagan usab og ganting salapi.

Ang Bangkarera 2009 subling gihimo sa kasaulogan sa 11th Charter Anniversary sa General Santos nga mao ang Septyembre 5 sa matag-tuig.

Kahinumduman nga niadtong Agosto 28, gisugdan ang pagpahigayon sa mga nagkalain-laing mga aktibidades sama sa Tuna Congress, Tuna Culinary Festival, Miss Gensan, ug uban pa. (JGRS)