NAPANITAN ang ulo sa usa ka habal-habal drayber human nga gipuspusan siya og magahi nga butang sa duha ka mga tawo kinsa nagpaka-arong-ingnong mga pasahero sa Polomolok, South Cotabato, Sabado sa gabii.

Ang biktima nahidangat sa balay tambalanan sa dakbayan sa General Santos ug giila nga si George Manglapus, 45 anyos, ug molupyo sa Uppler Klinan, Polomolok, South Cotabato.

Sa taho sa Bombo Radyo General Santos kagahapon sa buntag, aduna'y gihatod nga pasahero ang biktima sa Cannery Site sa Polomolok alas 6 ang takna sa gabii. Apan pagpabalik niya sa highway sa maong lugar, duha ka wa mailhing mga lalaki kinsa naghulat sa usa ka waiting shed ang mipara kaniya.

Sa pagtuo nga mosakay ang maong mga tawo, mihunong ang biktima apan kalit lamang siyang gipuspusan og magahi nga butang ngadto sa likod nga bahin sa iyang ulo sa usa sa mga suspetsado.

Nawad-an og panimuot ang biktima ug malampusong natangag sa mga suspetsado ang iyang pula nga Yamaha Krypton nga motorsiklo nga duna'y plaka numero IR-6947.

Usa ka concerned citizen ang nakakita sa biktima sa lugar ug gidala siya sa General Santos City District Hospital aron matambalan. Gikatahong napanitan ang ulo sa biktima ug nasuta nga kinahanglan kining ipailawon sa pagsusi.

Samtang sa inisyal nga imbestigasyon sa kapulisan, klarong ang motorsiklo lamang ang tuyo sa mga suspetsado tungod kay wa usab gihilabtan ang halin sa biktima sa iyang pagpamasada.

Gi-imbestigahan pa sa kapulisan ang panghitabo aron masayran kung mailhan pa ba sa biktima ang mga suspetsado nga posibleng makahatag kasulbaran sa kaso. (JGRS)