DUHA ka mga lalaki ang nakatulog sa selda sa Tambler Police Station human nga gireklamong nang-hostage og usa ka babaye sa Barangay Calumpang, dakbayan sa General Santos, di pa lamang dugay.

Si PO2 Edgardo Banguiran, sa Tambler Police Station, nag-ila sa mga lalaki nga sila si Ariel Baltazar, 22, molupyo sa Purok Balunto sa Barangay Calumpang, ug ang higala niining si George Rebelleza, 43, taga-Munda Subdivision sa Barangay City Heights, ning siyudad.

Ang maong mga lalaki gireklamo sa usa ka Emmalyn Uyanguren, 19, molupyo sa Purok San Miguel, Barangay Calumpang.

Ang insidente nahitabo alas 12:05 sa kaadlawon, Martes. Subay sa impormasyon gikan ni Banguiran, mibisita si Baltazar kuyog ang iyang higala nga si Rebelleza sa balay ni Uyanguren kinsa mao iyang ka-textmate.

Giingong nag-inom-inom ang mga mibisita sa babaye kauban ang mga higala sa naulahi nga sila si Elmer Laron ug Jonito Balanay, pulos hamtong ang panuigon, ug taga-susamang lugar ra usab.

Sa ilang pag-inom, nahitabo ang panaglalis tali nila ni Baltazar, Rebelleza ug sa mga higala sa babaye hinungdan nga gitabangan og kulata sa mga higala sa babaye ang mga dayo nga mga lalaki.

Sa dihang namatikdan nga dehado sila, si Baltazar ug Rebelleza ang mipugos og gunit ni Uyanguren isip "hostage" aron dili na sila kulatahon sa mga higala sa maong babaye.

Usa ka concerned citizen sa lugar ang mitawag og ayuda sa kapulisan ug wa nagdugay nasikop si Baltazar ug ang iyang higala.

Temporaryong napaslak sa selda sa Tambler Police Station si Baltazar ug si Rebelleza.

"Plano sa duha ka mga nakulatahan nga magpasaka og kaso. Plano pod sa babaye nga magpasaka og kaso against sa ilaha (Baltazar ug Rebelleza) kay sa dihang gi-hostage siya, nasamdan pod siya sa cutter nga gition sa duha ka mga lalaki. Bun-og na ang mga nang-hostage pag-abot dinhi sa istasyon pero gipatambalan usa namo una gibalhog sa selda. Kagabii (Martes sa gabii), na-settle sa both parties ang nahitabo. Wala na'y magpasaka og kaso," asoy sa pulis.

Dugang usab sa pulis nga gipagawas na usab sa selda ang duha ka mga lalaki kinsa nanghostage sa reklamanteng babaye pipila ka gutlo human nga nagkasinabtanay nga dili na magpasaka og kaso batok sa matag usa.