PATAY sa Municipal Hospital sa Malungon, Sarangani Province ang usa ka mag-uuma nga gidaro sa usa ka sakyanan samtang nitabok sa dalan sa Barangay Jose P. Laurel, alas 7 sa buntag, Miyerkules.

Ang kapulisan sa Malungon nag-ila sa biktima nga si Esmeraldo Laydan, 42, minyo, mag-uuma, ug molupyo sa  barangay samtang ang drayber sa Mitsubishi pick-up nga nagbaton sa plakang LCN- 370 giilang si Zosimo Montera Jr., 45, minyo, ug molupyo sa barangay Malalag Cogon.

Sa imbestigasyon sa kapulisan, nasuta nga gikan sa siyudad sa Digos ang drayber ug padung na sa pagpauli sa dihang wala  mabantayi ang pagtabok sa biktima sa National Highway.

Tungod sa kakusog sa impak sa pagkabangga, nilagpot ang biktima daplin sa dalan ug nabunal ang ulo ngadto sa semento hinungdan sa iyang kamatayon.
Ang biktima gisuwayan pa sa pagdala sa ospital apan wala na makaabot nga buhi.

Ang drayber sa pick-up bolontaryong mitahan ngadto sa Malungon Police Station aron atubangon ang kaso.(Mel Coronel)