SAKOP sa kapulisan sa Alabel Police Station ang gitudlong responsable sa pagpamusil sa usa ka magtiayon kon diin usa ang patay samtang usa ang samaron sa Barangay Poblacion, lungsod sa Alabel, Sarangani Province, alas 8 sa gabii niadtong Biyernes.

Ang kapulisan sa Alabel nag-ila sa mga biktima nga sila si Isaias Olino, 45, minyo, molupyo sa barangay Poblacion sa maong probinsiya, kinsa naputos ang tibuok lawas og mga samad pinusilan hinungdan sa iyang kamatayon. Samtang samaran sab ang iyang asawa nga si Nenita, 40.
Giila ang suspek nga pulis nga usa ka PO1 Jonathan Carbonel.

Sa imbestigasyon sa kapulisan, hubog nga nakauli ngadto sa iyang gi-arkilahang boarding house nga iya sa pamilyang Olino ang suspetsado nga pulis sa dihang nahitabo ang ilang lalis sa biktima nga si Isaias nga miresulta sa pagpamusil.

Si Nenita sa dihang nahinabi nagsaysay nga naglalis ang iyang bana ug ang suspek apan wala nila damhang kuhaon sa pulis ang iyang service firearms ug namusil kanila.

"Naga=board man god na siya sa balay sa akong ugangan tapos ang iyang boarding house saba kaayo kay hubog man siya. Ang TV ug ang radyo iyang gidungan sa pagpaandar. Wala lang namo na siya gibadlong kay kabalo mi nga hubog na pod na siya. Kung mahubog man god na siya pirming magpabuto sa iyang pusil. Nakurat na lang god mi tungod migawas na siya sa iyang boarding house gibitbit na ang pusil tapos gipaarakan ang akong bana," matud sa asawa.

Una na, matud pa, nga nasuko ang suspek tungod ginabadlong sa biktima sa iyang pagsige'g pabuto sa iyang armas sa higayon nga mahubog nga gikasuko sa naulahi.

Atol sa insidente, natusak-tusak ang lawas sa bana samtang apil nga naigo sa iyang walang bahin sa tiil ang asawa hinungdan nga sila gipangdala sa St. Elizabeth Hospital. Apan gideklarang dead on arrival sa mga mananambal si Isaias.

Nasuta nga daghang tawo sa gawas sa tindahan sa dihang gikuha sa suspetsado ang iyang M16 rifle armalite nga maoy gigamit sa pagpusil.

Mga sakop sa Scene of the Crimes Operative nakakuha og daghang basiyo sa M16 rifle armalite ug gidala sa crime laboratory aron gamitong ebidensiya.

Dili madawat sa asawa ang nahitabo sa iyang bana nga namatay hinungdan nga sila nakadesisyon nga dili magpaareglo inay ipadayon ang pagpasang-at og kaso batok kang Carbonel.

"Ipadayon gyud namo ang pagpasaka og kaso batok sa pulis. Dili namo gusto nga makabuhi pa siya tungod dili siya maayong pulis, ilabi na kung kini mahubog, maoy nga pulis na siya," dugang sa asawa.

Sa kasamtangan, anaa nabalhog sa selda sa Alabel Police Station ang maong pulis.

Ang pulis sa dihang gisulayan og kuha sa iyang pamahayag, nagdumili sa pagsulti bahin sa krimen nga nahitabo.