BLANGKO pa ang kapulisan kung kinsa ang nagpaluyo sa pagpamusil patay sa usa ka caretaker sa yuta sa Barangay Mabuhay, dakbayan sa General Santos, kinsa gipusil sa maka-upat nga higayon sa wa pa mailhing suspetsado, Lunes sa buntag.

Si San Isidro Police Senior Inspector Resty Balmores, nagbutyag nga gitan-aw sa ilang buhatan nga posibleng yuta ang hinungdan kung nganong gipusil patay ang biktimang si Generoso Bangis, 54, ug molupyo sa Malayang Nayon sa Barangay Mabuhay, ning siyudad.

"So far, sa karon, gina-establish pa namo kung unsa gyud ang motibo sa pagpamusil, wala pod mi'y nahipus nga istorya gikan sa relatives sa biktima," sulti ni Balmores samtang gihinabi sa Bombo Radyo General Santos.

Nasuta nga nahitabo ang insidente alas 6 sa buntag samtang naglakaw ang biktima mga 200 metros ang gilay-on gikan sa yuta nga iyang gibantayan. Apan usa ka wa mailhing lalaki ang miabot sakay sa motorsiklo ug kalit gipikhan ang biktima sa makaupat nga higayon ngadto sa iyang lawas.

Sa pakighinabi sa Superbalita ni San Isidro desk officer PO1 Ariel Beldera gibutyag niini nga naghigda na ang biktima sa yuta sa dihang nakit-an sa silingan niini.

"Nakit-an na lang ang biktima sa usa ka tawo nga taga-didto usab nga naghigda na. Base sa na-recover nga empty shell, .9mm pistol ang gigamit sa suspetsado," si Beldera nagsulti.

Dugang ni Beldera, wa na nadala sa balay tambalanan ang biktima tungod kay patay na kining nakaplagan sa iyang silingan.

Samtang gihinabi usab sa radyo ang silingan sa biktima kinsa nakakita sa naka-motor nga suspetsado. Butyag sa maong tawo (ngalan wa gibutyag), nag-inusara lamang ang suspek ug nagsakay sa itom nga DT nga motorsiklo.

"Buotan man siya (biktima) ug sa akong pagkabalao, wa na'y kaaway dinhi sa among lugar," pahayag sa silingan sa biktima.

Buot karon sa kapulisan nga makuhaan og pahayag ang pamilya sa biktima aron mahatagan og katin-awan ang pagkamatay niini. (JGRS)