HAPIT maputol ang liog sa usa ka factory worker human gitigbas sa iyang silingang mag-uuma nga gikaaway sa videokihan niadtong Dominggo sa kaadlawon sa Sitio Ubayon, Barangay Baring, lungsod sa Carmen.
Si Jenzen Heroza, 23, ulitawo, factory worker ug taga Barangay Cantipay, lungsod sa Carmen, napalgang patay nga naglunang sa kaugalingong dugo.
Samtang. Wala na igkita ang mga suspek nga si Ronnie Incedencia, 29, ulitawo mag-uuma ug usa ka ginganlag “Michael”, silingan sa biktima.
Si PO3 Jovanni Calderon, sakop sa Alert team sa Carmen Police Station, nagkanayon nga ang mga residente sa lugar mibutyag nga niadtong Dominggo sa alas 4:00 sa kaadlawon nakabati sila og kasaba.
Apan pagka-alas 8:00 sa buntag nakit-an nila ang biktima nga nagbuy-ob sa Barangay road nga naputos sa dugo nga dunay tinigbasan sa liog diin hapit maputol.
Sa pag-imbestigar nahibaw-an nga niadtong Dominggo sa gabii gikataho nga ang biktima nag-inom sa videokihan sa usa ka tindahan sa Baring uban niya ang silingan nga sila si Incedencia, ug Michael.
Ang mga tawo sa lugar miingon nga dihang nahubog ang biktima ug ang suspek nahitabo ang ilahang panaglalis sa wa matinong hinungdan. Giingong mibiya sila si Incedencia ug Michael.
Sa maong lugar, napalgan sa pagkabuntag ang lawas sa biktima nga patay na.
Nasubay sa kapulisan nga ang mga suspek nga mao ang responsabli sa krimen human nahabilin ang itom nga kawo niini sa crime scene.
Si PO3 Calderon niingon nga posibling nagkaaway ang mga biktima ug suspek sa videokihan sa wa matino nga hinungdan.