PATAY na nga nakaplagan sa usa ka siete anyos ang iyang inahang magtutudlo sa ilang balay kinsa naghikog gamit ang "cord" sa plantsa sa Barangay Labangal, dakbayan sa General Santos.

Ang biktima giila sa kapulisan nga si Pinky Rose Mahinay, 36, magtutudlo sa Grade four sa Special Education (Sped) sa Alabel, Sarangani Province, ug molupyo sa Dona Soledad Subdivision sa Barangay Labangal ning siyudad.

Si PNP Juanito Cerad sa Makar Police Station nagtug-an sa Superbalita kagahapon sa buntag nga nataho ang insidente sa ilang buhatan alas 12:15 na sa udto niadtong Huwebes.

Apan butyag sa pulis, alas 5:30 sa sayo sa buntag pa sa susamang adlaw nakaplagan ang patay'ng lawas sa biktima sa iyang anak.

"Naghigot sa liog ang biktima ug gi-attach sa taas nga bahin sa steel bed nga double deck. Gidala siya sa iyang mga kaubanan sa balay sa Mindanao Medical Center (MMC) pero dead on arrival na," sumala ni Cerad.

Sa impormasyon nga nahipus, ang biktima hapit usa na ka bulan nag-antos sa insomnia.

Butyag sa pulis base usab sa pahayag sa pamilya sa biktima, nagpatan-aw pa kini sa doktor tungod dili kini makatulog.

Apan sumala ni Cerad, imbestigahan pa nila ang nahitabo sa biktima aron masuta kung aduna ba'y mas lalom nga rason sa insidente ug kung aduna ba'y foul play sa hitabo.

"Wala kaayo naghatag og pahayag ang pamilya sa biktima, padayon pa man pod ang imbestigasyon," sulti ni Cerad.(JGRS)