NAKAMUGNA na og cartographic sketch ang kapulisan sa nagdunggab patay sa usa ka unom ka bulan nga mabdos sa parking area sa usa ka resort ug restaurant sa Purok Malakas, sakop sa Barangay San Isidro, dakbayan sa General Santos niadtong Agosto 16.

Sa pakighinabi sa Bombo Radyo General Santos ni San isidro Police Senior Inspector Resty Balmores, nasuta nga usa ka hired killer ang midunggab sa biktima kinsa daan na'ng akusado sa pagpatay sa Barangay Tambler sa dakbayan.

Apan wa pa gibutyag ni Balmores ang ngalan sa suspetsado tungod kay ginapalawman pa nila ang imbestigasyon aron mailhan kung kunsa gayud ang mastermind sa panghitabo.

Gipaniguro ni Balmores nga hingpit na nilang mapasaka ang kasong murder batok sa suspetsado karong semanaha.

Aduna'y mga taho nga usa ka anak sa iladong negosyante sa siyudad ang posibleng masangit usab sa kamatayon sa biktima apan wa pa kini gikumpirma sa kapulisan.

Kahinumduman nga niadtong Agosto 16, nakit-an na lamang nga wa na'y kinabuhi ang biktimang si Hazel Mae Sunga, 17, ug kanhing estudyante sa Notre Dame of Dadiangas University (NDMU) sa parking area sa Cambridge Farm and Restaurant sa Purok Malakas alas 7:45 sa gabii.

Wa na nadala sa ospital ang biktima kinsa nailhan lamang pinaagi sa ATM card nga nakit-an sulod sa bag niini.

Sa inisyal nga imbestigasyon, giingong nakit-an pa nga naglingkod-lingkod ang biktima sa reception area sa maong resort pasado alas 7 sa gabii sa usa ka Pinky, receptionist sa resort. Sulti ni Pinky sa mga imbestigador, iyaha pang gipangutana ang biktima kung mokuha ba kini og kwarto apan gibutyag sa uwahi nga aduna pa siya'y ginahulat.

Gikatahong migawas sa reception area ang biktima ug pipila ka gutlo ang milabay, usa ka singgit ang nadungog gikan sa parking area sa maong establisemento.

Sa pagsusi sa receptionist, nakit-an na lamang niya nga naghigda na ang biktima sa yuta nga nagkadugo na.

Nasuta nga 16 ka mga samad dinunggaban ang naangkon sa biktima ngadto sa nagkalain-laing parte sa iyang lawas. (JGRS)