GIUKOY na sa kapulisan ang usa ka grupo nga maoy responsable sa pagpangarnap sa mga single nga motorsiklo dinhi sa dakbayan sa General Santos.

Sumala pa nga laing usa ka drayber sa motorsiklo ang nahimong biktima sa grupo sa dihang gidala ang iyang motor ug wala na gibalik ala una sa kaadlawong Sabado.

Ang drayber nga midangop sa Pendatun Police Station giilang si Naroden del Rio, 22, minyo, molupyo sa barangay Buayan ning dakbayan sa General Santos.

Sa taho, ang biktima nagtug-an nga samtang tua siya nag-estambay sa Pioneer Avenue dala ang iyang Yamaha, kolor pula, nga nagbaton sa plakang 6427-MC, kalit lang miduol kaniya ang usa ka lalaki ug nagsukit-sukit bahin sa iyang motorsiklo.

Tungod kay nakadayeg sa matang sa makina, ang suspek mihangyo sa biktima nga sulayan niya og pagpadagan ang motorsiklo aron iyang masayran ang kondisyon niini.

Tuod man misugot ang biktima, apan nahibulong na siya nga sulod sa diyes minutos wala na mobalik ang suspek aron nga iuli ang iyang motorsiklo.
Ang biktima dali nga nangayo og tabang sa kuwerpo sa kapulisan ug sa iyang mga kaubanang drayber apan pakyas siyang makita ang suspek ug ang iyang motor.

Kahinumdoman nga niadtong milabayng semana, usa ka habal-habal drayber ang nabiktima sa grupong gitawag og Roadtest Gang diin estilo sa mga suspek mao ang paghulam sa mga motorsiklo aron suwayan og padagan apan di na iuli sa tag-iya.

Nanawagan sab ang kapulisan sa mga habal-habal drayber nga dili mokompiyansa sa mga tawo nga mohulam sa ilang mga motor inay itaho gilayon sa kapulisan.

Gipaalarma na sab sa tanang kapulisan sa kasikbit nga probinsiya ug munisipyo ang insidente aron nga ila kining mabantayan. (Mel Coronel)