USA ka motorsiklo nga gituohang gi-carnap sa wa mailhing mga responsible na-recover sa mga barangay police sa Barangay Calumpang, dakbayan sa General Santos, Martes sa gabii.

Si Eric Caburog, 23, tag-iya sa Yamaha nga motorsiklo, midangop sa buhatan sa Tambler Police Station ug nagbutyag nga giparada lamang niya ang iyang motorsiklo sa gawas sa ilang panimalay sa Purok Estrella sa Barangay Calumpang alas 9:30 sa gabii apan wa niya kini nabantayan ug gikuha, matud pa, sa wa mailhing nga responsable.

Sa pakighinabi sa Superbalita kang PO1 Dorly Abitago, sa Tambler Police Station, gibutyag niini nga usa ka oras una na-recover sa mga barangay police ang motorsiklo sa biktima.

"Nag-conduct og checkpoint ang mga barangay police sa Purok Estrella ug mga alas 10:30 gyud na-recover ang motor nga gibiyaan sa maong lugar nga nag-andar pa ang makina," sumala ni Abitago.

Dugang sa pulis, gi-turn over ang maong motorsiklo sa ilang buhatan sa mga nakakita niini.

"Gikuha na sa tag-iya ang motor ug nasuta nga walay nangawala nga mga importanteng dokumento nga gisulod sa U-box sa motor," sulti sa pulis.

Daan nang gipahimangno sa kapulisan sa mga residente sa siyudad nga bantayan ang mga importanteng butang nga init sa mga mata sa kawatan. (JGRS)