USA ka ginang ang nadala sa General Santos City Hospital human miyarok og Clorox sa purok Silway Fatima, barangay Dadingas West ning dakbayan sa General Santos, alas 10 sa buntag, Dominggo.

Ang biktima nagpatago lang sa iyang ngalan nga si alyas Jocelyn, 29, minyo, molupyo sa maong lugar.

Biktima gidala sa iyang duha ka mga anak sa ospital aron madapatan dayon og tambal.

Nasuta sab nga nag-away ang biktima ug ang iyang bana sa wa masayring rason hinungdan nga gikuha sa biktima ang usa ka sachet sa Clorox ug dayon gisagol sa alcohol ug gilala.

Human sa pagyarok sa biktima nawad-an uab kini sa maayong panimuot.

Matud sa nurse nga nag-atiman sa biktima nga ang biktima anaa na sa luwas nga kahimtang apan nagpabilin pa gihapon sa ospital.

"Maayo na man siya karon napainom na namo og tambal apan kinahanglan lang gihapon nga obserbahan kay daghan man gud ang iyang nainom nga Clorox nga gisagul sa alcohol," matud ni Jeng, usa ka nurse sa ospital.

Wala sab gisulti sa bana kung unsa ang lalom nga hinungdan sa ilang away nga gikasakit sa asawa hinungdan nga nakahuna-huna sa pagkutlo sa iyang kinabuhi.

Samtang nagdumili sab ang biktima sa pagpagawas sa iyang pamahayag nganong nahimo niya ang pagyarok sa Clorox.(Mel Coronel)