MAAYO na ang kahimtang ug makalakaw-lakaw na ang usa ka bagitong pulis nga napusilan sa iyang paa samtang nagsakay sa single nga motorsiklo kauban ang laing pang pulis sa Silway, Barangay Dadiangas West sa dakbayan sa General Santos, niadtong Huwebes sa kadlawon.

Si PO1 Jose Racsa, 24, ug lumad nga taga-Lambayong sa Sultan Kudarat, kinsa nasayrang nadestino sa PNP-Police Regional Office (PRO) 12, ang malampusong naoperahan sa General Santos City Hospital.

Apan hangtud karong panahona, blangko pa ang otoridad ug padayon pa usab ang gihimong imbestigasyon may kalabot sa insidenteng pagpamusil sa biktimang pulis.

Si Racsa nagtug-an nga siya mismo ang wala nakabalo kung asa naggikan ang buto sa pusil samtang miagi lamang sila sa iyang kaubanang pulis sa Silway sa Barangay Dadiangas West alas 2 ang takna sa kadlawon.

Samtang mitawag ang Superbalita kagahapon sa buntag sa buhatan sa Pendatun Police Station aron makakuha og pahayag sa imbestigador sa insidente apan sama sa miaging adlaw, dili gihapon makontak ang linya sa maong buhatan.(JGRS)