NAKAIKYAS ang usa sa traysikel drayber kinsa gireklamong nakabangga og usa ka bata sa Barangay Fatima sa dakbayan sa General Santos niadtong Dominggo sa gabii.

Gipagukod pa sa naasoy nga drayber ang pipila ka mga sakop sa Makar Police Station nga maoy nakakita kaniya sa likod nga bahin sa Barangay Hall sa Barangay Labangal.

Wa pa mailhi hangtud karong panahona ang drayber sa traysikel apan gikustodiya sa kapulisan sa Makar ang traysikel nga gi-abandona niini sa dihang miambak kini sa pikas nga bahin sa pader likod lamang sa Barangay Hall sa Barangay Labangal alas 8:45 sa gabii.

Sa pakighinabi sa Superbalita kang SPO1 Lemuel Lalona, sa Makar Police Station, nasuta nga usa ka Danilo Balitos, hamtong ang pangidaron, ug molupyo sa Barangay Fatima, ning siyudad ang mitimbre sa buhatan sa Makar Police ug mitaho nga usa ka traysikel nga duna'y plaka LY-710 ang nag-hit and run sa iyang anak (ngalan wa gibutyag) sa ilang lugar.

Padulong ang maong traysikel sa Makar hinungdan nga gitimbrehan ni Balitos ang kapulisan sa Makar aron madakpan ang drayber ug patubagon kini sa iyang gihimo.

"Na-intercept namo ang traysikel dinhi sa among area pero didto siya nakabangga sa Uhaw (Barangay Fatima)," si Lalona nagsulti.

Gikatahong nakabantay ang drayber sa traysikel nga duna'y mga nag-atang nga pulis kaniya sa dihang miabot kini sa kanto sa Purok Balunto sa Barangay Labangal hinungdan nga giliko niini ang gimanehong traysikel pasulod sa Bagong Silang sa Barangay Labangal kung diin siya gisundan sa mga pulis.

Apan sa dihang na-korner na ang naasoy nga drayber sa likod nga bahin sa Barangay Hall, misaka kini sa pader ug miambak sa pikas bahin niini.

"Base sa imbestigasyon, for hire ang traysikel ug gipanag-iyahan sa usa ka R.I. Pilapil. Initials lang ang nakabutang, wala'y color ang traysikel ug galvanized lang ni, naka-kustodiya dinhi sa among buhatan. Kalabot sa biktima nga nabanggaan sa drayber didto sa Uhaw, wa mi masayod sa kahimtang sa biktima kay sa Fatima na-report ang insidente," sumala ni Lalona.

Samtang mitawag kagahapon sa buntag ang Superbalita sa buhatan sa Fatima Police Station apan dili makontak ang linya niini sa telepono.

Padayon pang gi-imbestigahan sa kapulisan ang insidente aron masayran ang ngalan sa gireklamong drayber. (JGRS)