SI Malungon Mayor Reynaldo "BongBong" Constantino, Executive Vice President Sa Peoples Champ Movement (PCM), maoy mitubag sa pagsaway sa simbahang Katoliko bahin sa pagdagan ni Manny Pacquiao sa piliay isip kongresista sa Sarangani.

Kahinumduman nga nagpagawas og pamahayag si Bishop Denualdo Gutierez sa Diocese of Marbel pinaagi sa interview sa usa ka lokal television network bahin sa pagsulod ni Pacquiao sa politika. Gipahimangnoan sa pari ang Pambansang Kamao nga unahon na lang ang iyang pamilya, negosyo, ug ang pagkaboksingero inay sudlon ang hugaw nga politika tungod kay dili maayo ang mamahimong samputan niini tungod sa mga tawong nagpalibot kaniya.

Matud ni Mayor Constantino nga iyang girespeto ang pamahayag sa bishop tungod kay ila kanang katungod ang paghatag sa ilang opinion, apan sumala niya nga unta irespeto sab sa simbahan ang katungod ni Manny nga motabang sa katawhan.

"Ang akong matubag anaa unta magrespitohanay na lang ta dire, since duha ko ka tuig nga naglingkod isip mayor sa Malungon tan-awa ninyo ang development sa maong lungsod, ug kanang ginasulti nila nga napapaligiran ng mga gamblers si Manny? Pero ako nga usa nga nagapalibot sa iyaha, nagtoo ko nga dili ana ang mga tawo nga anaa sa palibot ni pareng Manny," matud ni Constantino.

Kompiyansa sab si Constantino nga andam na si Pacman sa iyang pagsulod sa politika gani posebling usa ka uwahing away na lang niya ang mahitabo karong Nobembre 14 batok sa Puerto Rican boxer nga si Miguel Cotto.

"Ang gusto namong mahitabo kang pareng Manny nga iyang I-dedicate ang sunod niyang away alang sa katawhan sa Sarangani. Bisan unsa pa na ang ginasulti sa uban pasagdahan na lang nato na. Ang importante nga atong sundon ang gusto mahitabo ni Manny nga iyang i-share sa mga taga-Sarangani ang blessings nga nadawat," dugang ni Constantino.

Luyo sa gipangsulti ni Pacquiao nga andam na siya sa umaabot nge election sa Sarangani atbang kang Roy Chiongbian, wala pa gihapon kini makapili og kinsa ang iyang mamahimong gobernador sa Sarangani atbang kang Gobernor Migs Dominguez. (Mel Coronel)