GISI ang sinina sa usa ka pulis human siya gidumog sa iyang silingang hubog kinsa iyang gipakalma sa dihang nagmaoy sa ilang lugar sa Barangay Apopong, dakbayan sa General Santos, Miyerkules sa gabii.

Buot mopasaka og kaso ni PO2 Maximo Ferolin, sakop sa Philippine National Police (PNP), nadestino sa Fatima Police Station, ug molupyo sa Lanton, Barangay Apopong, ning siyudad sa iyang silingan nga si Edilberto Cuaton, hamtong ang pangidaron.

Sa taho nga nahipus sa Makar Police Station, usa ka Mary Jane Maghaso, silingan sa biktimang pulis ang nangayo og tabang sa uwahi human nga gigukod sa suspetsado ang iyang anak (ngalan wa gibutyag) alas 8 sa gabii.

Angkon ni Maghaso, gipasanginlan sa suspetsado ang iyang anak nga usa ka kawatan hinungdan nga gigukod kini sa uwahi.

Wa nagduha-duha si Ferolin ug gisuwayan niya og pakalma ang suspetsado apan nasuko ang uwahi ug kalit lamang siyang gidumog hinungdan nga naligid siya sa yuta ug nagisi ang iyang suot nga t-shirt.

Wa na gitagaan og higayon sa suspetsado nga makapanimalos pa ang pulis ug midali-dali kini og dagan palayo sa maong lugar. Samtang mitawag og ayuda ang pulis ngadto sa buhatan sa Makar Police Station ug giadtoan ang panimalay sa suspetsado apan wa na kini didto.

Nasuta nga desidido gayud ang biktimang pulis nga magpasaka og pormal nga reklamo batok sa iyang silingan.