USA ka lalaki ang mireklamo human giingong gibunalan siya og pusil sa usa ka sakop sa Philippine National Police (PNP) sulod sa imnanan sa Barangay Lagao, dakbayan sa General Santos kagahapon sa kaadlawon.

Ang biktima mao si Jonas Marquez, 31, ug molupyo sa Gensanville Subdivision sa Barangay Bula.

Samtang ang iyang gireklamo mao si PO1 Ramil Panes, sakop sa PNP nga nadestino sa Tinagakan Police Station, ug molupyo sa Rosario Village sa Barangay Lagao, ning siyudad.

Sa imporamsyon nga nahipus gikan ni SPO1 Richie Ortiz, desk officer sa Lagao Police Station, dili lamang si Marquez ang mireklamo batok sa pulis apan gireklamo usab sa uwahi si Marquez.

Pahayag ni Panes, si Marquez ang nagmugna sa kasamok sulod sa Croco Bar sa dalang J. Catolico sa Barangay Lagao.

"Na-report ang insidente ala 1:30 kaganina (kagahapon sa kaadlawon). Duha man ni sila nagreklamo. Ang alegasyon ni Marquez, gibunalan daw siya og pusil sa pulis ug nanghasi pero ingon pod sa pulis, nag-inom sila sa iyang higala didto unya una miduol ning si Marquez ug naa'y confrontation nga nahitabo," sumala ni Ortiz.

Dugang pa sa maong pulis, pulos nakainom na ang duha ka mga nagreklamo sa dihang nahitabo ang panaglalis.

Nasayran nga wala naka-uniporme ang pulis nga giingong nalambigit sa kasamok sulod sa imnanan tungod kay off duty siya niadtong higayona.

Gihimo karon ang imbestigasyon sa kapulisan aron masuta ang tinuod nga nahitabo.

"Under investigation pa ang hitabo kay both man sila nagreklamo, wala'y pag-areglo nga natigayon. Kung magpasaka sila og kaso batok sa matag-usa, wala pod mi masayod sa pagkakaron," butyag ni Ortiz.