USA ka sakop sa Philippine National Police (PNP) ang gikatahong napusilan sa iyang tiil samtang sakay sa single nga motorsiklo sa Barangay Dadiangas West, dakbayan sa General Santos, kagahapon sa kaadlawon.

Sa taho sa Bombo Radyo General Santos kagahapon sa buntag, giila ang biktima pinaagi sa rekord sa balay tambalanan nga si PO1 Jose Romeo Racsa, hamtong ang panuigon, ug lumad nga taga-Lambayong sa Sultan Kudarat. Wa pa masayri kung diin nadestino ang pulis o kung molupyo ba siya sa dakbayan.

Mitawag sa pipila ka higayon ang Superbalita kagahapon sa buhatan sa Pendatun Police Station aron makakuha og dugang detalye sa gikatahong pagpamusil apan dili gayud makontak ang linya sa telepono sa maong buhatan.

Samtang sa taho sa radyo, ang biktimang pulis giingong sakay sa iyang motorsiklo kauban ang lain pang pulis nga giila lamang nga PO1 Sorongon.

Ang duruha gikatahong miagi sa Silway, Barangay Dadiangas West, ning siyudad alas 2 sa kaadlawon apan kalit lamang mipaka ang usa ka buto sa pusil.

Wala masayri kung diin gikan ang maong buto ug nasayran na lamang ni Racsa nga naigo na siya sa wala nga bahin sa iyang paa.

Mi-diretso ang duha ka mga pulis sa General Santos City District Hospital aron magpatambal. Sa taho, gi-operahan na kagahapong adlawa ang biktimang pulis.

Wala pa usab nakuhaan og pahayag ang mga imbestigador sa Pendatun Police Station may kalabot sa hitabo. (JGRS)