USA ka 29 anyos nga lalaki, kinsa gipasanginlang kawatan, gidunggab sa lain pang lalaki samtang natulog kini gawas sa iyang balay sa Barangay Apopong, dakbayan sa General Santos niadtong Dominggo sa gabii.

Giila sa kapulisan ang biktima nga si Larry Cayanong, hollow block maker, ug molupyo sa Purok 7, Sto. Ni¤o, Barangay Apopong, ning siyudad. Samtang tanggong karon sa selda sa Makar Police Station ang suspetsado nga si Alvin Ian Laron, 28 anyos, tigbaligya og herbal nga medisina, ug molupyo sa Purok 2, sa susamang lugar.

Sa impormasyon nga nahipus gikan ni SPO1 Lemuel Lalona, sa Makar Police Station, gibutyag niini nga nahitabo ang insidente alas 8:30 sa gabii samtang natulog ang biktima sa gawas nga bahin sa panimalay niini.

Giingong gipukaw sa suspetsado ang biktima ug sa way daghang istorya, gidunggab niya kini gamit ang icepick. Buslot ang bukton sa biktima human nga nasagang niya ang atake sa suspetsado kinsa buot unta siyang dunggabon sa iyang dughan.

"Duha ang samad sa biktima, sa wala ug tuo nga bukton. Nadakpan sa mga barangay tanod sa Apopong ang suspetsado ug gi-turn-over dinhi sa istasyon," pahayag ni Lalona.

Sa pagsukit-sukit sa pulis ngadto sa nadakpang suspetsado, gi-angkon sa uwahi nga gidunggab niya ang biktima tungod kay nangawat kini sa iyang balay. Samtang wa masayri kung unsang butang ang gikawat sa biktima ngadto sa balay sa suspetsado.

"Wala na-admit ang biktima, gipa-tambalan lang ang iyang samad. Mag-file man daw og kaso ang pamilya sa biktima pero wala pa sila kabalik, basi ugma (karong adlawa) sila mag-asikaso sa mga papeles kay holiday man karon," butyag sa pulis.

Sumala sa pulis, mamahimo man untang ireklamo sa suspetsado ang biktima kung tinuod gyud kining nangawat sa panimalay niini inay sa naghimo kini og lakang nga siya na hinuon mismo ang naduot. (JGRS)