PATAY ang usa ka tawo human nga nahulog sa dagat gikan sa lantsa nga iyang gisakyan sa dungguanan sa Queen Tuna Park (kanhing Lion's Beach) sa dakbayan sa General Santos niadtong Biyernes.

Hapon na nakit-an ang patay'ng lawas sa biktimang si Danny Singqui, laborer, hamtong ang pangidaron, ug molupyo sa Balut Island.

Sa impormasyon nga nahipus gikan ni PO1 Paul Tecson, desk officer sa Bula Police Station, alas 7 pa sa buntag nahulog sa dagat ang biktima apan alas 2 na sa hapon nakit-an ang patay'ng lawas niini.

Sumala sa pulis, sakay sa pampasaherong lantsa ang biktima kauban ang lain pang mga pasahero. Giingong dili moandar ang makina sa lantsa nga gisakyan sa biktima hinungdan nga gipaguyod na lamang kini sa lain pang lantsa.

"Gihigot ang gisakyang lantsa sa biktima ngadto sa lain pang lantsa pero natanggal ang pisi ug nalambod kini sa tiil sa biktima ug nabira siya padulong sa dagat. Gipangita sa mga miyembro sa Philippine Coast Guard (PCG) pero missing ang biktima hangtud kagahapon (Biyernes) sa buntag. Nakit-an na lang nga naglutaw ang biktima pagka-hapon na," sumala ni Tecson.

Samtang sa taho sa Bombo Radyo General Santos kagahapon sa buntag, lain pang duha ka mga pasahero ang nangaangol sa panghitabo ug nahulog usab sa dagat. Sumala sa taho, naluwas ang duha ka mga tawo ug kasamtangang gitambalan sa usa ka pribadong ospital sa siyudad. Apan wala gikumpirma sa kapulisan ang maong taho.

"Base sa among spot report, wala na may laing biktima sa panghitabo," sulti ni Tecson kinsa nagdugang nga anaa na sa Labajo Funeral Homes ang patay'ng lawas sa biktima ug gihulat na lamang nga kuhaon kini sa iyang mga kabanay.