Iloilo Bantay Dagat agresibo sa kampanya kontra illegal fishing

MATAPOS ang pagsikop sang Iloilo Bantay Dagat Task Force (IPBDTF) sa walo ka mga illegal nga sakayan-pangisda, dugang naman nga pito ka sakayan-pangisda nga nagapatigayon sa illegal nga pagpangisda ang nahulog sa mga kamot sa IPBDTF bangud sa ila agresibo nga kampanya batok sa illegal fishing sa probinsya.

Sa pito ka sakayan-pangisda nga nadakpan, duha diri ang nagapatigayon sang illegal nga pagpangisda sa baybayon sang Concepcion samtang lima naman sa baybayon sang Carles.

Ang mga sakayan-pangisda nga nagkaladakpan amo ang mga masunod: FB Raymund Joy sang Concepcion; FB Hans Michael sang Concepcion; FB Mika sang Carles; FB Mathew sang Carles ; FB Ma. Fe sang Batad; FB Rosal sang Estancia; kag FB Mikaela sang Estancia.

Ang mga nagkaladakpan nagagamit sang “super hulbot” kag “mid trawl” nga klase sang pagpangisda nga ginadumilian sa idalum sang R.A. 8550, Sec. 86, 89, 90, 104.

Ginrekomendar sang IPBDTF ang compromise fine para sa temporary nga kahilwayan sang mga crew kag paghatag warning nga indi na pagpadayunon ang ini nga hilikuton.

Ang IPBDTF may apat ka mga patrol boats nga naga operate sa mga banwa sang Ajuy, Banate, Carles, kag Concepcion.

May P1.5 million nga gindonar ang Bureau of Fisheries and Aquatic Resources (BFAR) sa Iloilo Provincial Government para sa dugang nga patrol boats. Ini para mas mangin masangkad kag agresibo ang kamapanya sang probinsya kontra illegal fishing. (Ray Cabarles/Balita Halin sa Kapitolyo)