DSWD ginpasalamatan ni Defensor

SI GOVERNOR Arthur Defensor Sr. nagpasalamat sa Department of Social Welfare and Development (DSWD) sa dugang nga 100 nga core shelter para sa mga kwalipikado nga pigado sa banwa sang Ajuy.

Ang gobernador nangin sentimental sa iya pagpasalamat sa DSWD sa ginhiwat nga turn-over sang nabilin nga pulo ka mga balay sa mga recipient sang Agosto 22, 2012, sa una nga hugnat sang core shelter project.

Sa adlaw sang turn-over, malipayon nga gin-anunsyo ni DSWD Western Visayas, Director Minda Brigoli nga makabaton naman ang nasambit nga banwa sang P7.2M para sa ikaduha nga hugnat sang sini nga proyekto.

Sa sini nga kantidad, dugang nga 100 ka pamilya sang Ajuy ang makaagum sang libre nga balay.

Sa idalum sang sini nga proyekto ang DSWD nagahatag P70,000 para sa materyales kag labor sa pagtukod sang balay. Ang banwa magahatag naman sang bakante nga lupa para matindugan sang sini nga proyekto bilang counterpart.

Lubos naman nga kalipay ang nabatyagan sang mga benepisyaryo bangud sang sini nga proyekto.

Ang turn-over sang core shelter upod man nga gintambungan ni Ajuy Mayor Juancho Alvarez, Board Member Jett Rojas, Ajuy SB Members, kag iban nga opisyal sang DSWD.
(Ray Cabarles/PR)