BISAN pa sa kanunay ug padayong imbestigasyon nga masumpo kining kurapsiyon sa atong nasud apan hangtud karon makadawat pa gihapon kita'g mga balita ug mga sumbong nga dunay mga ahensiya sa atong gobyerno nga nalambigit sa mga sama niini nga kontrobersiya.
Karon giluto na og maayo si Philippine National Police Chief General Allan Purisima sa Senado gumikan sa dili katuhoan nga pag-angkon og mga propedad nga dili mohaum sa iyang suweldo, nga kuno nakadawat sila og mga donasyon nga mga kabtangan nga minilyon ang kantidad. Namalit og mga sakyanan nga dili usab katuhoan ang diskuwento nga iyang gihisgutan.
Hinuon, si Purisima lamang ang makadepensa sa iyang kaugalingon sa mga intelehenteng mga pangutana sa atong mga banggiitang mga senador.
Nakita nako karon nga naa nay civil society nga giluod sa kahimtang karon ni Gen Purisima.
Karon sa tinuod lang ang dalaygong pulis nga akong nahibal-an (dili lang ta mo-alsa sa atong kaugalingong bangko) mao kining atong Davao City Police Office kun DCPO. Sanglit may mga pulis pa dinhi sa siyudad nga badlungon apan karespetuhan na kini. Kini tungod sa liderato sa atong Mayor nga si Rody Duterte. Gihimo ni Mayor Rody ang butang imposible sa pagkaposible.
Saludar kaming mga Dabawenyos sa atong mga pulis. Ayaw gayud kamo og sagul sa mga "Bad" nga pulis kay tingali'g maapil kamo sa mamahimong ilawog sa isda.
Biyaan nato kining sa pulis, dinhi ta ron sa bag-o nakong nabalitaan nga gahimo'g dili maayo sa ilang panerbisyo nga salapi ra gihapon ang hisgutanan.
Kining dinhi sa National Irrigation Administration kun NIA dinhi sa atong rehiyon. Naa kunoy opisyal sa NIA nga may kabtangan nga gipanag-iyahan nga dili mohaum sa iyang kinitaan? Naa poy opisyal nga tulo ka andana kuno ang panimalay diha sa Matina Aplaya?
Wala ko manghilabot sa ilang diskarte apan nangutana lang ko. Asa man ni gikan sila og kuwarta nga nahibalo na man ta pila lang ang ilang suweldo sa gobyerno nga ilang binulan nga ginadawat.
Seguro hagiton nato ang nagdumala sa NIA nga i-lifestyle check nato ang maong mga opisyal kay dili na kasarangan ang ilang pagkatawo itandi sa ubang nagtinarong.
Kitang yano nga mga lungsuranon nakapukos lang sa mga ahensiya nga maoy sagad makita nagahimo og kurapsiyon sama sa Deparment of Public Works and Highways kun DPWH.
Kurog-kurog kuno ang usa ka opisyal sa NIA sa dihang gisita kini sa usa ka kontraktor nga iyang gi-onse. Wala makalikay sa dihang gisulong siya sa iyang panimalay. Mr. Opisyal, i-uli na lang daw kadtong gastos sa kontraktor nga imong gipasaligan nga makakuha og kontrata sa NIA.
Hagit nako sa mga lungsuranon, itumbok na usab nato ang atong pagbantay diha sa mga proyekto sa NIA. NIA'y kurapsiyon dinha?