Negros Oriental

SA unang semana sa Disyembre, namakasyon mig kadiyot sa akong asawa sa Dumaguete City. Una kadtong higayon nga nakataak siya sa mao nga siyudad. Ang Dumaguete hinuon kaniadto ug karon, lahi na kay daghan nang tawo. Daghan na usab og mga sakyanan.

Naay moving traffic sa sentro, apan sa immediate periphery, okay ra ang dagan sa mga sakyanan. Nakaingon kong moving kay bisan naghuot ang mga sakyanan, makairog ra kay wa may paugatay. Kon dunay maapeke, palutson. Wa gani silay traffic lights nga gipamutang kay sagad nila courteous sa karsada. Way magpataka sa pagpadagan.

Mas nindot biseklitahan ang Dumaguete City o kaha mag jogging sa ilang boulevard nga hangtod karon, maanindot gihapon nga talan-awon. Dunay part sa highway nga sa akong tan-aw, luwas alang sa mga magbiseklita. Wa ko kabantay nga dunay four wheel nga mga sakyanan nga nisubay. Mga motorsiklo, scooter ug biseklita lang ang akong nakir-an.

Ang mao nga karsada medyo taas pud, molanat og pipila ka kilometro. Lain nakong nakit-an nga nindot nga dan mao ang Dumaguete City padung sa lungsod sa Valencia. Tungason ang karsada gikan sa Dumaguete padung sa mao nga lungsod. Apan inanay ang iyang tungas. Di gani kaayo nimo ma-feel nga hinayhinay kang nagsaka sa mao nga dan.

Lahi

Kaniadto, bati kaayo ang karsada sa Negros Oriental. Apan sa nakalabay nga dekada, anam-anam kining gipalambo nga bisan gani sa sudlunon nga mga lugar, arang-arang ang kahimtang sa mga dan. Hinuon, dunay mga nang-deteriorate, apan tagsa ra kaayo.

Mao diay nga dunay mga biker sa southern Cebu nga usahay akong ikadungan sa pipila ka higayon nga moadto kog Negros Oriental. Nindot biseklitahan ang Negros Oriental kay mas lapad ang mga karsada ug maanindot ang mga talan-awon. Apan kon itandi sa Cebu, gamay ra kaayo ang akong nakit-an nga nagsikad. Lahi sa Cebu nga buntag sayo, naandan nang talan-awon ang mountain ug road bikers.

Twin Lakes

Dunay nindot nga sakaon nga dapit sa Negros Oriental. Mao ni ang Twin Lakes nga naa sa sulod sa national park nga gilangkuban sa tulo ka mga lungsod. Naa sa tumoy sa bukid ang dapit. Sa akong bana-bana, moabot og 12 kilometros gikan sa highway ang dapit.

Sa hilig og saka sama nako, ideal ang lugar nga sikaran. Igo-igo nga molisngag ang ilong samtang nagtindak pasaka. Apan kahibawo ko, sa average nga siklista, kaya ra kaayo ni. Unyag abot sa ibabaw, di sab kabayran ang kaanindot sa mga talan-awon sa Twin Lakes. It is like paradise.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph