DAVAO -- Naningkamot karon ang kapulisan nga masayran ang tinuod nga motibo sa pagpamanhig nga miresulta sa kamatayon sa usa ka kanhi barangay kapitan ug sakop sa Citizen Armed Forces Geographical Unit (Cafgu) ug misamad og lain pang duha ka tawo niadtong Huwebes.

Ang insidente nahitabo sa alas 8:30 sa buntag didto sa Pamagtingan, Barangay Salaysay, distrito sa Marilog, siyudad sa Davao.

Namatay mao sila Canuto Lumbayon, 69, minyo, kanhi barangay kapitan sa Salaysay; ug Celso Agumay, 35; samtang nasamdan mao sila Jaime Egad Jr., 25; ug Ernesto Sauyan, 26, pulos molupyo sa maong barangay.

Si Pedro Canubas, usa sa mga kauban sa biktima, giingon nga wala masamdi atol sa pagpamanhig gumikan kay nakaambak siya sa motorsiklo ug mitago sa dakong kanal.

Mga namatay atua karon gihaya sa Angel Funeral Homes sa Calinan Poblacion samtang ang nasamdan atua gitambalan sa Davao Medical Center (DMC).

Basi sa sport report sa Marilog Police Station nga gipangulohan ni Police Chief Inspector William Corpuz, nasayran nga gikan ang mga biktima sa Barangay Lumondao, distrito sa Marilog, sakay sa duha ka motorsiklo pauli
na unta sa ilang balay didto sa Barangay Salaysay.