DUHA ka mga menor de edad ang gitabangan og lugos sa pito ka mga batan-ong lalake sa alas 11:30 sa gabii niadtong Biyernes didto sa St. Mary's Shrine, Barangay Buhangin, siyudad sa Davao.

Ang biktima gitago sa pangalan nga alyas Nena, 13, out-of-school youth ; ug alyas Baby, 17, out-of-school youth, pulos nagpuyo sa Barangay Buhangin.

Mga biktima giingon nga gitabangan og lugos sa pito ka mga suspetsado human sila nag-inom didto sa maong lugar.

Si SPO2 Joseph Limbaco, imbestigador sa Buhangin Police Station, nagsulti sa Superbalita nga nakadawat sila og taho gikan sa usa ka caretaker sa St. Mary's Parish nga dunay duha ka mga babaye nga gitabangan og lugos.

Matud ni Limbaco nga miadto dayon sila sa maong lugar ug didto ilang nakita ang mga biktima nga pulos naka-inom og alak.

Dihang ilang gipangutana ang mga biktima, ilang nasayran nga gilugos sila sa pito ka mga suspetsado hinungdan nga ilang gihimo ang manhunt operation.

"Nag-inom na sila kay mga barkada ra man sila unya dihang nahubog na ilang gilugos," sumala ni Limbaco.

Mga pulis malampusong misikop nila Julius (bansagon gitago kay menor); Miguillano (bansagon gitago kay menor); Edgar Cahulogan, 24, ug Arnolfo (bansagon gitago kay menor), pulos nagpuyo sa Barangay Buhangin.

Positibong giila sa mga biktima ang mga suspetsado nga maoy milugos kanila human sa ilang panag-inom.

Usa sa mga suspetsado miangkon nga nahimo niya ang paglugos sa biktima butang nga nakapalig-on sa teyoriya nga gitabangan og lugos ang mga biktima.

Gipasaka na kagahapon ang kasong lugos batok sa mga suspetsado ngadto sa City Prosecutor's Office (CPO) samtang ang laing tulo ka mga wa pa mailhing suspetsado gipangita na sa kapulisan. (Sun.Star Superbalita Davao)