USA ka tawo ang gipusil patay sa wa mailhing suspetsado nga nagsakay og motorsiklo sa alas 2:00 sa kaadlawon kagahapon didto sa Tulip Drive, Barangay Matina Crossing, siyudad sa Davao.

Ang biktima sanglit way identification cards gilawaran sa kapulisan nga nagpangidaron og 30 anyos, tabonon ang pamanit, kasarangan ang panglawasan, dunay gitas-on nga lima ka tiil ug lima ka pulgada, nagsul-ob og maong nga pantalon ug itom nga t-shirt.

Suma sa imbestigasyon ni SPO1 Reynaldo Gustilo sa Talomo Police Station, napalgan ang biktima sa usa ka security guard sa Fuente Villa Abrille Subdivision nga nahimutang sa Tulip Drive.

Si Reviriano Rufano, 45, minyo, security guard sa Mahugani Security Agency nagbutyag sa kapulisan nga samtang nag-roving siya sa maong subdivision iyang nadungog ang tulo sa masipang buto sa armas ug andar sa motorsiklo nga daling mibiya sa nahitaboan.

Ang gwardiya, human nadungog ang buto sa armas, nagsusi sa gawas sa maong subdivision ug didto iyang nakita ang biktima nga nabulit sa kaugalingon dugo ug nagbuy-od daplin sa kalsada didto sa Tulip Drive.

Tungod niini, ang gwardiya nanawag og police assistance sa pamasin nga matabang pa ang biktima.

Ang biktima giingon nga patay na dihang miabot ang mga sakop sa Central 911 nga miresponde sa maong krimen.

Dihang gisusi sa mga sakop sa Scene of the Crime Operatives (Soco), nakaangkon ang biktima og tulo ka samad pinusilan sa iyang ulo nga maoy hinungdan sa iyang kamatayon.

Nakuha sa mga otoridad ang tulo ka baseyo sa bala sa kalibre .45 nga pistola nga maoy gigamit sa suspetsado sa pagpatay sa biktima.

Ang patay'ng lawas sa biktima gidala sa mga otoridad didto sa Angel Funeral Homes, dalang F. Torres, siyudad sa Davao.

Sa gihimong pakisusi sa Superbalita kagahapon sa hapon didto sa punerarya, nasayran nga alas 11:00 sa buntag miabot ang inahan sa biktima ug positibong giila ang namatay nga mao si Archie Baylosis, napuyo sa sa Purok 3, Spring Valley, Barangay Buhangin, ning siyudad.

Wa pay kasayuran ang kapulisan bahin sa motibo sa mga suspetsado apan sila misaad nga himuon ang makuting imbestigasyon aron ilhon ang mga mamumuno. (Sun.Star Superbalita Davao)