SUBLING gihasi sa mga sakop sa dautang elemento ang Globe Telecom pinaagi sa pagpabusikad og usa ka wa matinong matang sa eksplosibo kagahapon sa kaadlawon didto sa Barangay Paquibato Proper, distrito sa Paquibato, siyudad sa Davao.

Si barangay kapitan Pronilo Soriño sa Barangay Paquibato Proper maoy nagpahibalo kang Senior Inspector Devi Liboon, hepe sa Paquibato Police Station, sa maong insidente pinaagi sa text message.

Nagpadala si Soriño og text message sa maong opisyal sa alas 7:00 sa buntag ug nagpahibalo nga gipabuthan sa wa mailhing mga suspetsado sa alas 2:00 sa kaadlawon ang Globe Monopole Tower nga nahimutang sa maong barangay.

Suma sa maong taho, way nasamdan sa maong insidente.

Tungod niini, nagsusi karon ang mga imbestigador sa kapulisan sa Paquibato sa maong hitabo aron sayron kung pila ang danyos sa maong patigayon.

Gipaladman usab sa kapulisan ang ilang imbestigasyon aron sayron kung unsang grupo ang naghimo sa pagbusikad sa Globe Monopole Tower.

Pipila na ka bulan ang milabay, gipabuthan sa mga rebeldeng New People's Army ang usa ka Globe Monopole Tower didto gihapon sa maong barangay. (Sun.Star Superbalita Davao)